Уй-жой фонди ва уни шакллантириш

Уй-жой фонди тушунчаси

Уй-жой фонди инсоннинг доимий яшаши учун яроқли бўлган турар жойлардан иборат. Унга:

уйлар;
квартиралар;
хизмат турар жойлари;
ётоқхоналар;
вақтинчалик уй-жой фонди уйлари;
ногиронлиги бўлган шахслар, фахрийлар ва ёлғиз кексалар учун интернат-уйлар;
болалар уйлари ва бошқа махсус мақсадли уйлар киради.

Уйлардаги савдо, маиший хизмат, офис ва бошқа носаноат мақсадларига мўлжалланган яшаш учун мўлжалланмаган жойлар уй-жой фондига кирмайди.

Уй-жой фонди турлари

Уй-жой фонди хусусий ва давлат уй-жой фондларига бўлинади.

Хусусий уй-жой фондига:

фуқароларнинг якка тартибдаги уйлари;
хусусийлаштирилган, қурилган ёки сотиб олинган уй ва квартиралар;
пай бадали тўлиқ тўланган кооператив квартиралари;
нодавлат юридик шахсларга тегишли уй-жойлар киради.

Давлат уй-жой фонди:

муниципал уй-жой фонди;
идоравий уй-жой фонди;
аниқ мақсадли коммунал уй-жой фондидан иборат.

Уй-жой фондига киритиш

Қурилиши тугалланган уй ёки турар жой фойдаланишга қабул қилиниши ва унга бўлган ҳуқуқ давлат рўйхатидан ўтказилиши керак. Кўчмас мулкка бўлган ҳуқуқнинг давлат рўйхатидан ўтказилиши объектнинг уй-жой фондига киритилганини тасдиқлайди.

Муҳим: объектнинг амалда яшаш учун ишлатилаётгани уни автоматик равишда уй-жой фондига киритмайди. Объектнинг мақсади ва унга бўлган ҳуқуқ белгиланган тартибда расмийлаштирилиши шарт.

Уй-жой фондидан чиқариш

Уй ёки турар жой қуйидаги ҳолларда уй-жой фондидан чиқарилиши мумкин:

авария ҳолатида бўлса ёки яшаш учун яроқсиз деб топилса;
белгиланган тартибда бузилса;
турар жойни яшаш учун мўлжалланмаган жойга ўтказиш тўғрисида қарор қабул қилинса.

Яшаш учун яроқли турар жойни нотурар жойга ўтказишга, қоида тариқасида, йўл қўйилмайди. Бунга алоҳида ҳолларда мулкдор ёки унинг вакили аризаси асосида, белгиланган талабларга риоя этилган ҳолда рухсат берилади.

Уйнинг техник ҳолати махсус комиссия томонидан ўрганилади. Комиссия хулосаси асосида тегишли қарор қабул қилиниб, кўчмас мулк маълумотларига ўзгартириш киритилади.