Томорқа ва деҳқон хўжаликлари

Томорқа хўжалиги

«Томорқа хўжалиги тўғрисида»ги Қонунга мувофиқ, томорқа хўжалиги шахсий томорқа ер участкасида қишлоқ хўжалиги маҳсулотларини эркин ва мустақил равишда етиштириш ёки қайта ишлаш билан боғлиқ фаолиятдир.

Томорқа хўжалигидаги фаолият, асосан, ер участкаси эгаси ва унинг оила аъзоларининг шахсий меҳнатига асосланади. Етиштирилган маҳсулотни сотиш, унинг нархини белгилаш ва олинган даромадни тасарруф этиш ер участкаси эгаси томонидан мустақил амалга оширилади.

Ер участкаси эгаси ундан рухсат этилган фойдаланишнинг асосий турига мувофиқ оқилона фойдаланиши, қишлоқ хўжалиги экинларини экиши ёки ерни ободонлаштириши керак.

Деҳқон хўжалиги

«Деҳқон хўжалиги тўғрисида»ги Қонунга мувофиқ, деҳқон хўжалиги юридик шахс ташкил этган ёки ташкил этмаган ҳолда қишлоқ хўжалиги маҳсулотларини етиштириш ва сотиш билан шуғулланиши мумкин.

Деҳқон хўжалигининг бошлиғи муомалага лаёқатли, вояга етган Ўзбекистон фуқароси ёки Ўзбекистонда доимий яшовчи фуқаролиги бўлмаган шахс бўлиши мумкин.

Хўжаликни ҳисобга қўйиш ёки давлат рўйхатидан ўтказиш Давлат хизматлари маркази ёки электрон давлат хизматлари орқали амалга оширилади.

Деҳқон хўжалигини рўйхатдан ўтказиш, ҳисобга қўйиш, ерга бўлган ҳуқуқни давлат рўйхатидан ўтказиш ва реестрдан кўчирма бериш учун давлат божи ҳамда йиғим ундирилмайди.

Деҳқон хўжалиги учун ер майдони

Умумий қоидага кўра, деҳқон хўжалиги учун 0,06 гектардан 1 гектаргача ер участкаси берилади.

Президент қарорлари билан белгиланган айрим ҳудудларда чорва озуқаси экинларини етиштириш учун 0,06 гектардан 5 гектаргача ер берилиши мумкин.

Фермер хўжалиги ёки бошқа қишлоқ хўжалиги корхонасининг асосий экиндан бўшаган ери оралиқ экин экиш учун 0,06 гектардан 10 гектаргача, бир йилгача бўлган муддатга иккиламчи ижарага берилиши мумкин. Бундай ерни учинчи шахсга бериш тақиқланади.

Ердан фойдаланиш шартлари

Деҳқон хўжалиги ердан белгиланган ихтисослашув ва рухсат этилган фойдаланиш турига мувофиқ фойдаланиши шарт. Ерда енгил конструкцияли иссиқхоналар, суғориш иншоотлари ва маҳсулот етиштириш учун зарур енгил объектлар жойлаштирилиши мумкин.

Ерда қонунчиликда рухсат этилмаган капитал бино ва иншоотларни қуриш мумкин эмас.

Ерни учинчи шахсларга ўзбошимчалик билан бериш, белгиланган мақсаддан ташқари фойдаланиш ёки ерни қаровсиз қолдириш ерга бўлган ҳуқуқнинг бекор қилинишига сабаб бўлиши мумкин.