Аҳолига суюлтирилган углеводород газини етказиб бериш тартиби

Суюлтирилган газ кимларга етказиб берилади

Суюлтирилган углеводород гази, асосан:

табиий газ тармоғи мавжуд бўлмаган;
табиий газ билан барқарор таъминланмаган;
белгиланган рўйхат ва етказиб бериш жадвалига киритилган аҳоли ҳамда ижтимоий соҳа объектларига етказиб берилади.

Истеъмолчи суюлтирилган газдан шартномада белгиланган маиший мақсадда, асосан овқат тайёрлаш учун фойдаланиши керак.

Эҳтиёжни аниқлаш

Газ таъминоти ташкилотлари истеъмолчилар, маҳалла ва маҳаллий ҳокимликлар иштирокида жорий йилнинг 1 июлига қадар келгуси йил учун прогноз ҳажмини шакллантиради.

Бунда битта истеъмолчига ойига камида:

битта маиший газ баллони;
баллонда 20 килограмм суюлтирилган газ етказиб бериш ҳисобга олинади.

Шартнома тузиш

Газ таъминоти ташкилоти ва истеъмолчи ўртасида суюлтирилган газ етказиб бериш шартномаси тузилади.

Шартномада:

истеъмолчининг манзили;
шахсий ҳисобварағи;
етказиб бериш шартлари;
тарафларнинг ҳуқуқ ва мажбуриятлари;
тўлов тартиби;
баллондан хавфсиз фойдаланиш шартлари кўрсатилади.

Муҳим: газ таъминоти ташкилоти ва истеъмолчи ўртасида шартнома тузмасдан суюлтирилган газ ёки маиший газ баллонини етказиб бериш ва қабул қилиш тақиқланади.

Етказиб бериш

Суюлтирилган газ:

махсус автотранспорт воситаларида;
тасдиқланган жадвал бўйича;
маиший баллонларда, гуруҳли баллон қурилмаларида ёки махсус сиғимларда етказилади.

Баллонда етказилганда бўш баллон тўлдирилган баллонга алмаштирилади. Техник носоз ёки техник кўрикдан ўтмаган баллонни газ билан тўлдириш тақиқланади.

Тўлов

Истеъмолчи ҳақиқатда етказиб берилган суюлтирилган газ учун шартнома асосида тўлов қилади.

Тўлов истеъмолчининг танловига кўра тўлов қабул қилиш шохобчалари ёки электрон тизимлар орқали амалга оширилади.

Газ таъминоти ташкилоти ходимининг нақд пул қабул қилишига йўл қўйилмайди, онлайн назорат-касса машинаси орқали расмий чек бериладиган ҳолатлар бундан мустасно.

Газ кам ёки кечиктириб етказилса

Истеъмолчига етказилган баллонда газ миқдори 20 килограммдан кам бўлса ёки етказиб бериш тасдиқланган жадвалдан асоссиз кечикса, истеъмолчи:

газ таъминоти ташкилотига;
«Ҳудудгазтаъминот» АЖга;
истеъмолчилар ҳуқуқларини ҳимоя қилувчи органларга мурожаат қилиши мумкин.

Баллон қабул қилинаётганда унинг оғирлиги, техник ҳолати, пломбасы ва тўлов чекини текшириш тавсия этилади.

Тартиб Вазирлар Маҳкамасининг 646-сон қарори билан белгиланган.