Ёшлар дафтарига киритиш ва ижтимоий ёрдам олиш тартиби

YOSHLAR DAFTARI

«Ёшлар дафтари» нима?

«Ёшлар дафтари» — ижтимоий-иқтисодий қўллаб-қувватлашга, билим, касб ва кўникмаларни эгаллашга муҳтож ёшларни аниқлаш ҳамда уларга мақсадли ёрдам кўрсатиш тизими.

Дафтарга яшаш ёки турган жойи бўйича 14 ёшга тўлган ва 31 ёшга тўлмаган шахслар киритилиши мумкин.

Кимлар киритилади?

Қуйидаги ёшлар киритилиши мумкин:

Ижтимоий реестрга киритилган оиланинг 14–30 ёшдаги аъзоси;
оила аъзолари ҳар бирига тўғри келадиган ойлик даромад минимал истеъмол харажатларининг 2 бараваридан ошмайдиган оиланинг 14–30 ёшдаги аъзоси — фақат жарроҳлик амалиётисиз даволаниш ёки жарроҳлик харажатларини қоплаш ёрдами учун.

Шахс «Ёшлар дафтари»га киритиш билан бир вақтда ўзига зарур бўлган битта аниқ ижтимоий ёрдам турини ва сўралаётган миқдорни кўрсатиши керак.

Қандай мурожаат қилинади?

Ариза:

исталган Давлат хизматлари марказига;
Ягона интерактив давлат хизматлари портали орқали;
Ёшлар ягона электрон платформаси орқали берилади.

ЯИДХП ва Ёшлар ягона электрон платформаси орқали аризалар дам олиш ва байрам кунларидан қатъи назар 24 соат давомида юборилиши мумкин. Ижтимоий ҳолат «Ягона миллий ижтимоий ҳимоя» тизими орқали, бошқа мезонлар эса тегишли ахборот тизимлари орқали автоматик текширилади.

Ариза қандай кўриб чиқилади?

Мурожаат тегишли маҳалладаги ёшлар етакчисига электрон тарзда юборилади. Ёрдам турига қараб ариза берувчи билан ижтимоий шартнома расмийлаштирилиши мумкин.

Ижтимоий шартнома — ижтимоий ёрдам олувчи ёшнинг таълим, бандлик, волонтёрлик ёки ўзини ривожлантириш бўйича мажбуриятларини белгилайдиган электрон келишув.

«Маҳалла еттилиги» мурожаат ва ҳужжатларни 5 иш куни ичида ўрганиб, оддий кўпчилик овоз билан дафтарга киритиш ва ёрдам ажратиш ёки рад этиш ҳақида қарор қабул қилади. Натижа СМС ва электрон шахсий кабинет орқали хабар қилинади.

Қандай ёрдам турлари мавжуд?

Белгиланган мезонларга қараб:

ёшлар бандлиги ва ижтимоий фаоллигига қаратилган лойиҳалар учун грантлар;
ногиронлиги бўлган ёшларнинг параспорт машғулотларига йўлкира харажатлари;
спорт анжомлари, махсус форма ёки мусиқа асбоблари;
жарроҳлик амалиётисиз даволаниш ва жарроҳлик харажатлари;
ҳайдовчилик курслари учун субсидия;
профессионал ва олий таълим тўлов-контрактининг бир қисми;
ижтимоий ҳимояга муҳтож ёш оилаларга ижара компенсацияси;
касб, тадбиркорлик, ахборот технологиялари ва хорижий тил курслари;
фан, спорт, санъат ва маданият бўйича курслар ҳамда мусобақалар харажатлари;
сафарбарлик чақируви резервида бепул хизмат ўташ учун тавсиянома каби ёрдамлар кўрсатилиши мумкин.

Қайси ҳолларда рад этилиши мумкин?

Қуйидагилар рад этишга асос бўлиши мумкин:

шахс белгиланган ёш ёки ижтимоий мезонга жавоб бермаса;
сўралаётган ёрдам турининг шартлари бажарилмаса;
аризада нотўғри маълумот берилса;
зарур ҳужжатлар тақдим этилмаса.

Нотўғри маълумот ёки етишмаётган ҳужжат аниқланса, ариза берувчига уларни 5 иш куни ичида тузатиш ёки тақдим этиш имконияти берилади. Қарордан юқори турувчи Ёшлар ишлари органига ёки маъмурий судга шикоят қилиш мумкин.

Норматив ҳужжатлар

Вазирлар Маҳкамасининг 2022 йил 7 июндаги 312-сон қарори