БМТнинг Хотин-қизлар тузилмаси (UN Women)

UN Women нима билан шуғулланади

БМТнинг Хотин-қизлар тузилмаси — UN Women гендер тенгликни таъминлаш, хотин-қизларнинг ҳуқуқ ва имкониятларини кенгайтириш бўйича фаолият олиб борувчи БМТ тузилмасидир.

Ташкилот БМТга аъзо давлатларга халқаро стандартларни миллий сиёсат ва дастурларга жорий этишда кўмаклашади, давлат органлари ва фуқаролик жамияти билан ҳамкорлик қилади ҳамда гендер тенглик соҳасидаги натижаларни мониторинг қилади.

UN Women фаолиятининг асосий йўналишлари:

хотин-қизларнинг давлат ва жамият бошқарувида иштирокини кенгайтириш;
муносиб меҳнат, даромад ва иқтисодий мустақиллик имкониятларини ошириш;
хотин-қизларга нисбатан зўравонлик ва тазйиқнинг олдини олиш;
тинчлик ўрнатиш ва гуманитар жараёнларда хотин-қизлар иштирокини таъминлаш;
гендерга сезгир қонунчилик, бюджет ва давлат дастурларини ривожлантириш;
камситувчи ижтимоий қарашлар ва одатларни бартараф этиш.

UN Women суд ёки ҳуқуқни муҳофаза қилувчи орган эмас. Ташкилот индивидуал низолар бўйича мажбурий қарор чиқармайди, балки давлатларга сиёсий, экспертлик ва дастурий ёрдам кўрсатади.

UN Women’нинг Ўзбекистондаги фаолияти

UN Women 2025 йил 27 майда Ўзбекистонда ўз ваколатхонасини очди. Бу ташкилотнинг давлат органлари, фуқаролик жамияти ва халқаро ҳамкорлар билан доимий асосда ишлаш имкониятини кенгайтирди. Ваколатхона очилиши ҳақидаги маълумот UN Women’нинг расмий хабарида эълон қилинган.

Ўзбекистонда ташкилот гендер тенгликни таъминлаш, хотин-қизларнинг иқтисодий ва сиёсий фаоллигини ошириш, зўравонликнинг олдини олиш, гендер статистикаси ва гендерга сезгир бюджетлаштириш йўналишларида ҳамкорлик қилади.

Миллий қонунчиликда мазкур соҳадаги асосий кафолатлар «Хотин-қизлар ва эркаклар учун тенг ҳуқуқ ҳамда имкониятлар кафолатлари тўғрисида»ги Қонун билан белгиланган.

Жинс бўйича тўғридан-тўғри ёки билвосита камситишга йўл қўйилмайди. Шахс ўз ҳуқуқлари бузилган деб ҳисобласа, ваколатли давлат органларига ёки судга мурожаат қилиши мумкин.