Ўсимлик дунёси объектларидан махсус фойдаланиш рухсатномаси бўйича қандай талабларга риоя қилиш керак?

Рухсатнома қандай доирада амал қилади?

Ўсимлик дунёси объектларидан махсус фойдаланиш тасдиқланган квоталар доирасида амалга оширилади.

Рухсатнома эгаси фақат ҳужжатда белгиланган ўсимлик тури, ҳажм, ҳудуд, муддат ва бошқа шартлар доирасида фаолият юритиши керак.

Рухсатномага ўзбошимчалик билан тузатиш ёки қўшимча киритишга йўл қўйилмайди.

Табиатни тиклаш бўйича мажбурият борми?

Ҳа. Ёввойи ўсимликларни тайёрлаш ишлари амалга оширилаётган ҳудудларда ўсимликларнинг табиий ўсиш жойларини сақлаш, қайта тиклаш ва зарур ҳолларда бузилган ўсимлик ҳамда тупроқ қопламини рекультивация қилиш чоралари кўрилиши керак.

Муҳофаза этиладиган табиий ҳудудларда махсус фойдаланиш ушбу ҳудуд учун белгиланган режимга мувофиқ амалга оширилади.

Рухсатномани бошқа шахсга бериш мумкинми?

Рухсатнома муайян ариза берувчига берилади. Табиатдан фойдаланиш устидан давлат назоратини таъминлаш мақсадида ёввойи ўсимликларни йиғишга берилган рухсатномани бошқа шахсга ўзбошимчалик билан ўтказиш мумкин эмас.

Ариза берувчининг ишончли вакили қонунчиликда белгиланган тартибда унинг номидан ҳаракат қилиши мумкин.

Рухсатнома тугагач нима қилиш керак?

Рухсатноманинг амал қилиш муддати тугаганидан кейин 10 иш куни ичида ваколатли органга қисқа ҳисобот тақдим этилади.

Ҳисоботда:

йиғилган ёки тайёрланган ўсимлик ҳажми;
фойдаланиш вақти;
ўсимлик йиғилган жой кўрсатилади.

Рухсатнома олишнинг асосий параметрлари қандай?

Аризани кўриб чиқиш учун БҲМнинг 30 фоизи миқдорида йиғим тўланади. Аризани кўриб чиқишнинг амалдаги муддати — 10 иш куни.

Ўсимликнинг тури ва фойдаланиш ҳажмига қараб махсус фойдаланиш учун алоҳида тўлов ҳам ҳисобланиши мумкин.

Эслатма: рухсатнома мавжудлиги квотадан ортиқ ёки рухсатномада кўрсатилмаган бошқа ҳудудда ўсимлик йиғиш ҳуқуқини бермайди.