Суд қарори чиққандан кейин кредит фоизи ва пеня ҳисобланадими?

Суд қарори чиқса фоиз ҳисоблаш тўхтайдими?

Ҳа. Кредит қарздорлигини ундириш ҳақида суднинг ҳал қилув қарори чиқарилганда суд қарорида кўрсатилган, ундирилиши лозим бўлган суммага нисбатан қонунда назарда тутилган фоизлар ва неустойка ҳисобланиши тўхтатилади.

Неустойка — мажбурият бажарилмаган ёки лозим даражада бажарилмаган ҳолда тўланадиган жарима ёки пеня.

Бу қарз бекор қилинади деганими?

Йўқ. Суд қарори чиққанидан кейин қарзнинг ўзи йўқолмайди.

Суд қарорида ундирилиши белгиланган:

асосий қарз;
қарорга киритилган фоизлар;
қарор билан ундирилиши белгиланган неустойка ва бошқа суммалар тўланиши лозим. Янги қоида суд қарорида кўрсатилган ундирув суммасига нисбатан кейинги фоиз ва неустойканинг ўсиб боришини тўхтатади.

Қарзни қисман тўлаганда пул аввал нимага ҳисобланади?

Агар жисмоний шахс ёки тадбиркорлик субъекти кредит ёки микроқарз бўйича тўлаган сумма барча мажбуриятни қоплаш учун етарли бўлмаса, қарз қуйидаги навбатда сўндирилади:

асосий қарзнинг муддати ўтган қисми ва муддати ўтган фоизлар — мутаносиб равишда;
жорий давр фоизлари ва жорий асосий қарз;
неустойка — жарима ва пеня;
кредиторнинг қарздорликни ундириш билан боғлиқ бошқа харажатлари.

Бу тартиб тўлов биринчи навбатда фақат жарима ва пеняга кетиб, асосий қарз камаймай қолишининг олдини олишга қаратилган.

Қоида қачондан амал қилади?

Мазкур ўзгартишлар 2024 йил 1 январдан эътиборан юзага келган муносабатларга ҳам татбиқ этилади.

Шу сабаб кредит қарздорлиги бўйича суд ҳужжати мавжуд бўлса, банк ҳисоб-китобида суд қароридаги суммага кейинги давр учун фоиз ва пеня қўшилиб бораётган-бормаётганини текшириш мумкин.

Банк ҳисоблашни давом эттирса нима қилиш мумкин?

Аввало банкдан кредит қарздорлиги бўйича батафсил ҳисоб-китоб ва суд қарори асосида қайта ҳисоблашни сўраш мақсадга мувофиқ.

Агар ҳисоб-китоб қонун талабларига мослаштирилмаса, фуқаро ўз ҳуқуқини банкка расмий мурожаат, ваколатли органга шикоят ёки суд тартибида ҳимоя қилиши мумкин.

Эслатма: фоиз ва пеня бутун кредит тарихи бўйича автоматик кечирилмайди. Ҳисоблаш айнан суд ҳал қилув қарорида ундирилиши белгиланган суммага нисбатан тўхтайди.