Қайси тоифадаги шахсларга олий таълим муассасаларига кириш учун 4 фоизлик квота берилади?

Олий таълим муассасаларига кириш имтиҳонлари қачондан бошланиши маълум бўлди - UzNews.uz

Тавсиянома бериладиган хотин-қизлар

Вазирлар Маҳкамасининг 2020 йил 23 июндаги 402-сон қарорига мувофиқ, қўшимча давлат гранти доирасидаги танловда иштирок этиш учун тавсиянома қуйидаги тоифаларга берилади:

Ижтимоий реестрга киритилган оилаларнинг хотин-қизларига;
отаси ёки онаси ёхуд уларнинг иккаласи ҳам вафот этган, тўлиқсиз оилада тарбияланаётган ижтимоий ҳимояга муҳтож қизларга;
турмуш ўртоғи вафот этган ва вояга етмаган фарзандини ёлғиз тарбиялаётган ижтимоий ҳимояга муҳтож аёлларга;
ногиронлиги бўлган фарзанди бор эҳтиёжманд оилалардаги хотин-қизларга;
икки ва ундан ортиқ фарзандни тарбиялаётган, бошқа қариндошларидан алоҳида ёки ижарада яшаётган ижтимоий ҳимояга муҳтож ёлғиз аёлларнинг қиз фарзандларига;
ота-онасидан бири ёки ҳар иккиси I ёки II гуруҳ ногиронлиги бўлган эҳтиёжманд оилалардаги хотин-қизларга.

Тавсиянома юқоридаги мезонлардан камида бирига мос келадиган барча талабгор хотин-қизларга берилади. Тавсияномалар сонини сунъий равишда чеклашга йўл қўйилмайди.

Ариза бериш тартиби ва муддати

Талабгор тавсиянома олиш учун доимий яшаш ёки вақтинча турган жойи бўйича туман ёки шаҳар оила ва хотин-қизлар бўлимига электрон шаклда мурожаат қилади.

Аризалар ва тегишли маълумотлар ҳар йили 30 майдан 8 июнга қадар қабул қилинади.

Талабгорнинг белгиланган мезонларга мувофиқлигини тасдиқловчи туғилганлик, никоҳ қайд этилганлиги, вафот этганлик, ногиронлик ва бошқа маълумотлар ишчи гуруҳ томонидан «Рақамли ҳукумат» тизимининг идоралараро интеграциялашув платформаси орқали тегишли давлат органларининг ахборот тизимларидан олинади.

Зарур ҳолларда оиланинг эҳтиёжмандлик даражасини аниқлашда «Темир дафтар», «Аёллар дафтари» ва **«Ёшлар дафтари»**даги маълумотлардан ҳам фойдаланилади.

Аризани кўриб чиқиш ва тавсияномани бериш

Ишчи гуруҳлар аризаларни ҳар йили 10 июнга қадар кўриб чиқади ва тавсиянома бериш тавсия этилган хотин-қизлар рўйхатини шакллантиради.

Аризани кўриб чиқиш натижаси бўйича талабгорнинг телефон рақами ёки электрон почта манзилига тавсиянома бериш тавсия этилганлиги ёхуд рад этилганлиги ҳақида хабар юборилади.

Оила ва хотин-қизлар қўмитаси 14 июнга қадар тавсияномаларни электрон ҳужжат шаклида расмийлаштиради. Туман ёки шаҳар оила ва хотин-қизлар бўлимлари эса 15 июнга қадар тавсияноманинг талабгорга етказилишини таъминлайди.

Тавсиянома электрон ҳужжат шаклида берилади ва бир йил давомида амал қилади.

Тавсиянома қандай ҳуқуқ беради?

Тавсиянома эҳтиёжманд оилалардаги хотин-қизларга олий таълим ташкилотларига ажратилган қўшимча 4 фоизли давлат гранти доирасида танловда иштирок этиш ҳуқуқини беради.

Ушбу имтиёз абитуриент рўйхатдан ўтишда танлаган биринчи бакалавриат таълим йўналиши бўйича қўлланилади.

Алоҳида қабул кўрсаткичлари доирасида талабаликка тавсия этилмаган абитуриент ўзи танлаган таълим йўналишлари бўйича умумий танловда иштирок этишда давом этади.

Тавсиянома иккинчи ва ундан кейинги олий маълумотни олиш учун ўтказиладиган танловга нисбатан татбиқ этилмайди.