1-maydan boshlab Toshkent — Xiva yo‘nalishi bo‘yicha Hyundai Rotem tezyurar poyezdini ishga tushirish reja qilinmoqda. Birinchi tarkib allaqachon mamlakatga olib kelingan, yil davomida yana beshtasi keltiriladi, deya ma’lum qildi transport vaziri Ilhom Mahkamov. Istiqbolda yo‘nalishni Nukusgacha uzaytirish ko‘zlangan.

Toshkent — Xiva yo‘nalishidagi Hyundai Rotem tezyurar poyezdini 1-maydan boshlab ishga tushirish reja qilinmoqda. 18-mart kuni prezident Shavkat Mirziyoyev Samarqand viloyatining Narpay tumaniga tashrifi chog‘ida yangi tarkibni sinovdan o‘tkazdi.

Transport vaziri Ilhom Mahkamovning “O‘zbekiston 24” telekanaliga bergan intervyusida ma’lum qilishicha, mamlakat bunday poyezddan oltita xarid qilgan.

Uning so‘zlariga ko‘ra, harakatning yo‘lga qo‘yilishi infratuzilmani modernizatsiya qilish tufayli amalga oshirildi.

“Muhtaram prezidentimiz tashabbuslari bilan, eng avvalo, Xivagacha bo‘lgan temir yo‘l tarmog‘ini elektrlashtirish va uni yuqori tezlikdagi poyezdlar harakatiga moslashtirish ishlari yakunlandi. Natijada 1-maydan boshlab Toshkent — Xiva yo‘nalishida poyezdlar qatnovini yo‘lga qo‘yamiz”, — deb ta’kidladi vazir.

Yil yakuniga qadar yana beshta poyezd olib kelinishi kutilmoqda.

“Oltita poyezdning barchasi Xivagacha qatnaydi. Prezident topshirig‘iga binoan, Nukusgacha bo‘lgan yo‘lni elektrlashtirish ishlari ham olib borilmoqda, shundan so‘ng Nukus yo‘nalishida ham poyezdlar harakatini yo‘lga qo‘yamiz”, — deya qo‘shimcha qildi Ilhom Mahkamov.

Poyezd tashqi ko‘rinishi oq rangda bo‘lib, oynalari qoraytirilgan hamda O‘zbekiston bayrog‘iga ishora qiluvchi moviy, yashil va qizil chiziqlar bilan bezatilgan.

Sarkarda Jaloliddin Manguberdi nomi berilgan ushbu poyezd yetkazib berilishi kerak bo‘lgan oltita poyezddan birinchisi bo‘ldi. U 7 ta vagondan iborat bo‘lib, taxminan 390 nafar yo‘lovchiga mo‘ljallangan va soatiga 260 km tezlikkacha chiqa oladi. Yo‘lovchilar uchun xizmat ko‘rsatishning uchta toifasi — VIP, biznes va ekonom klassi mavjud bo‘ladi.

Ta’kidlanishicha, uzunligi 175 metr bo‘lgan ushbu poyezd mamlakat iqlimiga moslashtirilgan bo‘lib, u chang-to‘zonga, haroratning keskin o‘zgarishiga va qum bo‘ronlariga chidamli hisoblanadi. Yaqin orada uni Toshkent — Urganch — Xiva yo‘nalishida ishga tushirish rejalashtirilgan bo‘lib, bunda yo‘l vaqti hozirgi 13 soatdan taxminan 7 soatgacha qisqaradi.

Yuqori tezlikdagi Hyundai Rotem elektropoyezdlarini yetkazib berish bo‘yicha shartnoma 2024-yil iyun oyida Janubiy Koreya prezidentining O‘zbekistonga tashrifi chog‘ida imzolangan edi.

Loyihaning umumiy qiymati 220,03 mln yevroga baholanmoqda. O‘zbekiston 21,3 mln yevro, “O‘zbekiston temir yo‘llari” kompaniyasi 13,5 mln yevro, Koreya Eksimbanki esa 10 yillik imtiyozli davr bilan 40 yil muddatga 185,18 mln yevro ekvivalentida Koreya vonida kredit ajratadi.

Yangi poyezd uchun uzunligi 465 km bo‘lgan “Buxoro-Urganch-Xiva” yo‘nalishi elektrlashtirildi.

Yaqin yillarda 196 kilometrlik “Miskin — Nukus” temir yo‘l tarmog‘i elektrlashtiriladi. Buning natijasida Toshkentdan Nukusgacha bo‘lgan yo‘l vaqti 16 soatdan 7 soatgacha qisqaradi.