O‘zbekistonda sanoat, elektr transport va raqamli infratuzilmaning tez rivojlanishi elektr energiyasiga talabni sezilarli oshirishi kutilmoqda. Shu sababli yangi elektr stansiyalari, energiya saqlash tizimlari va yuqori kuchlanishli tarmoqlarni talabdan oldin rivojlantirish rejalashtirilmoqda.

22-sentabr kuni Prezidentga elektr energetikasini o‘rta va uzoq muddatli rivojlantirish rejalari taqdim etildi. Rasmiy hisob-kitoblarga ko‘ra, iqtisodiyot, aholi soni, sanoat, elektromobillar va data-markazlar kengayishi energetika tizimiga qo‘shimcha yuklama beradi.

2030-yilgacha faqat sanoat sohasining elektr energiyasi iste’moli 38 mlrd kVt·soatdan 53,5 mlrd kVt·soatgacha o‘sishi prognoz qilinmoqda.

Shu bois elektr ishlab chiqarish quvvatlarini talabdan oldin oshirish, tarmoqlarning o‘tkazuvchanligini kengaytirish va yetarli zaxira quvvatlarini shakllantirish zarurligi qayd etildi.

Rejaga ko‘ra, mamlakatdagi generatsiya quvvati 2030-yilda 46,1 GVtga, yillik elektr ishlab chiqarish imkoniyati esa qariyb 129 mlrd kVt·soatga yetkaziladi.

2035-yilga borib generatsiya quvvati 57,2 GVt, yillik ishlab chiqarish esa 154,7 mlrd kVt·soat bo‘lishi ko‘zda tutilgan.

Hozir quyosh va shamol elektr stansiyalarining umumiy quvvati 6,3 GVtdan oshgan, gidroelektr stansiyalar quvvati esa 2,5 GVtga yaqinlashgan.

Bundan tashqari, umumiy quvvati 4,2 GVt bo‘lgan 26 ta energiya saqlash loyihasi shakllantirilgan. Ularning 17 tasi amalga oshirish bosqichida.

2030-yilgacha 9 ta 220 kV va 7 ta 500 kV podstansiya, shuningdek, qariyb 5 ming km yangi elektr uzatish tarmoqlari qurilishi rejalashtirilgan.

Muhim: elektromobillar elektr tizimi uchun “muammo” sifatida ko‘rsatilmagan. Ular sanoat va data-markazlar bilan bir qatorda kelgusida elektrga talabni oshiradigan omillardan biri sifatida qayd etilgan.