2027-yildan O‘zbekistondagi 75 ta oliy ta’lim muassasasida “korxona — oliygoh — maqsadli kadr” tizimi yo‘lga qo‘yiladi. Unda ish beruvchiga zarur nomzod OTMga test sinovisiz, suhbat asosida qabul qilinishi nazarda tutilgan. 2028-yildan tizim barcha oliygohlarda amal qilishi rejalashtirilgan.

Nomzod ish beruvchi ehtiyojidan kelib chiqib tayyorlanadi

Yangi modelda korxona o‘ziga zarur mutaxassisni tayyorlash bo‘yicha oliy ta’lim muassasasiga buyurtma beradi. Shu buyurtma asosida tanlangan nomzod test sinovini topshirmasdan, suhbat orqali o‘qishga qabul qilinadi.

Talaba nazariy bilimni oliygohda olish bilan birga, korxonada ishlab, o‘z mutaxassisligi bo‘yicha amaliy ko‘nikmalarni ham shakllantiradi.

Muhim: testsiz qabul barcha abituriyentlarga emas, aynan “korxona — oliygoh — maqsadli kadr” tizimi doirasida ish beruvchining buyurtmasi asosida tanlangan nomzodlarga nisbatan qo‘llanadi.

Talaba maoshining yarmini davlat qoplaydi

Dual ta’lim doirasida ishga qabul qilingan talabaga to‘lanadigan ish haqining 50 foizi davlat tomonidan qoplanadi. Korxona oliygoh yoki talabaning yashash joyidan uzoqda bo‘lsa, ijara xarajatlarini qoplash ham nazarda tutilgan.

Korxona tomonidan talabaga biriktirilgan ustozga esa oliygoh pedagoglari oyligiga teng miqdorda qo‘shimcha haq to‘lanadi.

Yaxshi natija ko‘rsatgan talabalar grantga o‘tishi mumkin

O‘qish va mehnat faoliyatida yuqori natija ko‘rsatgan talabalar ikkinchi kursdan davlat granti asosida o‘qishga o‘tishi mumkin.

Oliygohlarda dual ta’lim bilan shug‘ullanuvchi alohida bo‘limlar tashkil etiladi. Tizimni namunali yo‘lga qo‘ygan uchta eng yaxshi OTM va hamkor korxonalarning har biri 1 mlrd so‘mdan 3 mlrd so‘mgacha mukofotlanadi. Oliy ta’lim muassasasiga berilgan mukofotning yarmi bu ishga hissa qo‘shgan pedagoglarni rag‘batlantirishga yo‘naltiriladi.

Tizim bosqichma-bosqich kengaytiriladi

Yangi mexanizm 2027-yildan 75 ta OTMda, 2028-yildan esa barcha oliy ta’lim muassasalarida joriy etilishi belgilangan. Prezident matbuot xizmati ushbu yo‘nalishda tegishli qaror imzolanganini ma’lum qilgan.