Автомобиль йўлларини қуриш, реконструкция қилиш ва таъмирлаш

Автомобиль йўлларининг турлари

Автомобиль йўллари:

умумий фойдаланишдаги автомобиль йўллари;
шаҳарлар ва бошқа аҳоли пунктларининг кўчалари;
хўжалик автомобиль йўлларига бўлинади.

Умумий фойдаланишдаги автомобиль йўллари ҳамда шаҳарлар ва бошқа аҳоли пунктларининг кўчалари давлат мулки ҳисобланади.

Хўжалик автомобиль йўллари давлатга, юридик ёки жисмоний шахсларга тегишли бўлиши мумкин. Уларга технологик, шохобча, хизмат, патруль ва бошқа шу каби йўллар киради.

Лойиҳалаш ва қуриш

Автомобиль йўлларини лойиҳалаш, қуриш ва реконструкция қилиш қонунчиликда белгиланган тартибда юридик шахслар томонидан амалга оширилади.

Қуриш ёки реконструкция қилиш учун ишлаб чиқилган шаҳарсозлик ва лойиҳа ҳужжатлари белгиланган тартибда давлат экспертизасидан ўтказилиши керак.

Экспертизада, жумладан:

лойиҳа ечимларининг шаҳарсозлик нормаларига мувофиқлиги;
ҳаракат хавфсизлиги;
йўлнинг техник кўрсаткичлари;
муҳандислик коммуникациялари;
экологик ва бошқа мажбурий талаблар текширилади.

Муҳим: автомобиль йўлига янги туташма ёки кириш-чиқиш йўлини ўзбошимчалик билан қуриш мумкин эмас.

Муҳандислик коммуникациялари

Йўл учун ажратилган минтақада электр, алоқа, газ, сув, канализация ва бошқа муҳандислик коммуникацияларини қуриш ёки реконструкция қилиш лойиҳаси йўл қайси ташкилот ёки шахс ихтиёрида бўлса, ўша субъект билан келишилиши керак.

Агар умумий фойдаланишдаги йўл билан туташган ёки уни кесиб ўтган йўл шаҳарсозлик талабларини бузган ҳолда қурилса, ваколатли орган:

объектни қайта қуриш;
ҳудудни дастлабки ҳолатига келтириш ҳақида қарор қабул қилиши мумкин.

Таъмирлаш ва сақлаш

Автомобиль йўлини таъмирлаш ва сақлашни йўл қайси давлат органи, юридик ёки жисмоний шахс ихтиёрида бўлса, ўша субъект таъминлайди.

Бу ишлар ихтисослаштирилган йўл ташкилотлари орқали бажарилиши мумкин. Темир йўл кесишмалари, осма кўприклар, паром кечувлари ва бошқа алоҳида иншоотларни таъмирлаш улар қайси юридик шахс ихтиёрида бўлса, ўша шахс томонидан амалга оширилади.

Автомобиль йўлларини лойиҳалаш, қуриш, реконструкция қилиш ва таъмирлаш тартиби «Автомобиль йўллари тўғрисида»ги Қонун билан белгиланган.