Автокредит олиш

Автокредит олиш учун нима қилиш керак?

Автомобиль сотиб олиш учун кредит олиш истагида бўлган шахс банкка кредит буюртмаси билан мурожаат қилади. Кредитнинг миқдори, муддати, фоиз ставкаси, бошланғич бадал, таъминот тури ва бошқа шартлар банкнинг тегишли кредит маҳсулотига қараб белгиланади.

Банкларнинг кредит бериш шартлари, фоиз ставкалари, тарифлари ва бошқа тўловлари ҳақидаги маълумотлар очиқ бўлиши керак. Кредит шартномаси тузилишидан олдин банк мижозга кредитнинг шартлари ва тўлиқ қиймати ҳақида маълумот бериши шарт.

Қандай ҳужжатлар талаб қилиниши мумкин?

Кредит олиш учун кредит буюртмаси ва қарз олувчининг даромадлари ҳақидаги маълумотларни ўз ичига олган ҳужжатлар тақдим этилади.

Кредит буюртмасида, жумладан:

шахсга доир маълумотлар;
кредит объекти;
кредит муддати;
фаолият тури ва даромадлар;
кредит мажбуриятларини таъминлаш усули кўрсатилади.

Автомобиль сотиб олиш билан боғлиқ шартнома, ҳисобварақ ёки бошқа ҳужжатлар ҳам банк томонидан талаб қилиниши мумкин. Ҳужжатларнинг аниқ рўйхати банкнинг кредит бериш қоидаларига мувофиқ белгиланади. Шу сабабли барча автокредитлар учун бир хил ҳужжатлар рўйхати мавжуд эмас.

Кредит олиш учун гаров ёки кафил керакми?

Кредит бўйича мажбуриятларнинг бажарилиши:

банк ёки суғурта ташкилотининг кафолати;
учинчи шахс кафиллиги;
мол-мулк ёки қимматли қоғозлар гарови;
қонунчиликда ёки шартномада назарда тутилган бошқа усуллар билан таъминланиши мумкин.

Шунинг учун айнан 2 нафар жисмоний шахснинг кафиллиги ҳар бир автокредит учун мажбурий талаб ҳисобланмайди. Қандай таъминот талаб қилиниши банк ва танланган кредит маҳсулоти шартларига боғлиқ.

Кредит буюртмаси қанча вақтда кўриб чиқилади?

Истеъмол кредити берувчи ташкилот кредит буюртмасини олганидан кейин 5 иш куни ичида кредит бериш ёки уни асослантирилган ҳолда рад этиш ҳақида қарор қабул қилади.

Кредит бериш рад этилса, бу ҳақда истеъмолчига ёзма шаклда маълум қилиниши керак. Кредитни баҳолашда қарз олувчининг даромадлари етарлилиги, кредит тарихи, тақдим этилган маълумотларнинг ўзаро мувофиқлиги ва кредитни қайтариш имконияти таҳлил қилинади.

Кредитни муддатидан олдин тўлаш мумкинми?

Истеъмолчи кредитни ва унга ҳисобланган фоизларни муддатидан олдин тўлашга ҳақли. Бундай ҳолда фоизлар кредитдан амалда фойдаланилган муддат учун тўланади.

Эслатма: автокредитни расмийлаштиришдан олдин фақат фоиз ставкасига эмас, балки кредитнинг тўлиқ қиймати, суғурта, гаров, комиссиялар ва бошқа мажбурий тўловларга ҳам эътибор бериш лозим.