Айрим товарларни реклама қилишга қўйиладиган талаблар

Рекламага қандай умумий талаблар қўйилади?

Ўзбекистон ҳудудида реклама давлат тилида тарқатилади. Қонун талабларига риоя қилинган ҳолда реклама мазмунининг таржимаси бошқа тилларда ҳам такрор берилиши мумкин.

Агар реклама қилинаётган фаолият лицензия ёки рухсат этиш хусусиятига эга ҳужжатни талаб қилса, реклама берувчи реклама тайёрловчи ёки тарқатувчига тегишли ҳужжатни тақдим этиши шарт. Мажбурий сертификатланиши лозим бўлган товар реклама қилинганда тегишли сертификат ҳам тақдим этилади.

Алкоголь маҳсулотларини реклама қилиш мумкинми?

Умумий қоидага кўра, ҳар қандай қувватдаги алкоголь маҳсулотларини реклама қилиш тақиқланади. Бироқ пиво, табиий ва кўпикланадиган винолар учун истисно мавжуд.

Уларни:

меҳмонхоналарда;
савдо ва умумий овқатланиш корхоналарининг савдо залларида;
маҳсулотни намойиш қилиш ва татиб кўриш жойларида;
ишлаб чиқарувчи ва сотувчиларнинг расмий веб-саҳифаларида ёшга оид таснифни кўрсатган ҳолда;
темир йўл ва ҳаво транспортида;
телевидение ва радиода соат 23:00 дан 07:00 гача реклама қилиш мумкин.

Бундай реклама майдони ёки вақтининг камида 10 фоизи маҳсулотни ҳаддан зиёд истеъмол қилиш зарари ҳақидаги огоҳлантириш ва уни истеъмол қилиши тавсия этилмайдиган шахслар ҳақидаги маълумотга ажратилиши керак.

Рекламада алкоголь истеъмол қилиш жараёни ёки инсон образидан фойдаланиш, маҳсулотни безарар ёки муваффақиятга олиб келувчи восита сифатида кўрсатиш мумкин эмас. Рағбатлантирувчи акциялар ва маданий-кўнгилочар, оммавий ҳамда спорт тадбирларига ҳомийлик қилиш ҳам тақиқланган.

Тамаки ва никотин маҳсулотлари рекламасига рухсат бериладими?

Йўқ. Тамаки маҳсулотлари, шунингдек тамаки ва никотинни истеъмол қилиш мосламаларини реклама қилиш тақиқланган.

Уларни сотишни рағбатлантириш мақсадида:

намуналарини бепул тарқатиш;
чегирма бериш;
товар белгиси ёки тасвиридан фойдаланилган тадбирларга ҳомийлик қилиш;
бренд белгилари туширилган товарларни тарқатиш;
қонун билан тақиқланган бошқа реклама акцияларини ўтказиш ҳам мумкин эмас.

Энергетик ичимликлар рекламаси қандай чекланган?

Энергетик ичимлик рекламасида уларни ҳаддан зиёд истеъмол қилиш зарари ва бундай ичимликлар тавсия этилмайдиган шахслар ҳақида мажбурий огоҳлантириш бўлиши керак.

Қуйидагилар тақиқланади:

телевидение ва радиода соат 07:00 дан 22:00 гача реклама қилиш;
ташқи реклама конструкцияларида жойлаштириш;
вояга етмаганларга реклама қилиш ёки уларга бепул намуна тарқатиш;
вояга етмаганлар учун мўлжалланган тадбирларга бренддан фойдаланган ҳолда ҳомийлик қилиш;
болалар ва ўсмирларга мўлжалланган босма нашрларда, тиббиёт, спорт ва таълим муассасаларида реклама қилиш;
энергетик ичимликлар иштирокида рағбатлантирувчи акциялар ўтказиш.