Давлат мактабларида мактаб формасига қўйиладиган талаблар

Мактаб формаси кимларга татбиқ этилади?

Низом давлат умумий ўрта таълим муассасалари ўқувчилари учун ягона мактаб формасини жорий этиш тартибини белгилайди.

Унинг талаблари:

давлат умумтаълим мактаблари ўқувчилари учун мажбурий;
ихтисослаштирилган санъат ва маданият мактаблари;
олимпия захиралари мактаблари ва мактаб-интернатларига татбиқ этилмайди.

Ягона мактаб формаси — давлат томонидан тасдиқланган намуна, ранг ва техник талабларга мувофиқ ўқувчилар учун мўлжалланган кийим.

Қарорда ягона форма тасдиқланган шакллар асосида босқичма-босқич жорий этилиши белгиланган. Мактаб ота-оналарга амалда қўлланилаётган намуна ва харид тартибини тушунтириши керак.

Форма қандай бўлиши керак?

Форма:

ўта тор ёки ўта кенг бўлмаслиги;
тоза ва дазмолланган бўлиши;
матоси боланинг ёши ва санитария талабларига мос бўлиши;
шим почаси тўпиқдан пастда туриши;
оёқ кийим пошнаси 3 сантиметрдан баланд бўлмаслиги керак.

Қизлар юбкасининг узунлиги тиззадан 5–15 сантиметр пастда бўлиши белгиланган. Кўйлакнинг энг юқоридаги битта тугмасидан ташқари бошқа тугмалари қадалган бўлиши лозим.

Совуқ ёки иссиқ ҳавода енгиллик борми?

Об-ҳавога қараб ўқувчи:

нимча ёки костюмни;
узун ёки калта енгли кўйлакни ихтиёрий танлаши мумкин.

Қишки ўқиш даврида қизларга ягона мактаб формасига мос шим кийишга рухсат берилади.

Ташқи кўриниш бўйича қандай талаблар бор?

Мактаб биноси ичида, махсус тадбирлардан ташқари, бош кийимсиз юриш талаб қилинади. Тасдиқланган формага дин, конфессия ёки субмаданиятга мансубликни акс эттирувчи элементларни қўшишга йўл қўйилмайди.

Шунингдек, низомда ўқувчиларнинг:

тананинг очиқ қисмида татуировка ёки пирсинг билан;
сочни ёрқин рангга бўяб;
кўзга ташланувчи макияж, узун ёки бўялган тирноқлар билан;
ўғил болаларнинг соқол ёки 2–3 сантиметрдан узун соч билан келишларига оид чекловлар белгиланган.

Формани қаердан олиш ҳақида ким маълумот беради?

Мактаб раҳбарияти ҳар йили 1 майга қадар:

форманинг рангли намунасини;
матонинг таркиби ва ранги ҳақидаги маълумотни;
уни қаердан ва қандай харид қилиш мумкинлигини кўринарли жойга жойлаштириши керак.

Қоида бузилса қандай чора кўрилади?

Форма талабларига риоя қилмаслик ички тартиб-қоидани бузиш деб баҳоланади. Ўқувчига нисбатан:

огоҳлантириш;
кундаликка қайд киритиш;
ота-онани хабардор қилиш;
масалани ота-она иштирокида муҳокама қилиш чоралари қўлланиши мумкин.

Ўқувчининг мактабга формада келишини таъминлаш учун ота-она масъул, талабларга риоя этилишини эса мактаб раҳбарияти ва педагоглар назорат қилади.

Норматив ҳужжатлар

Вазирлар Маҳкамасининг 2018 йил 15 августдаги 666-сон қарори