Davlat maktablarida maktab formasiga qo‘yiladigan talablar

Maktab formasi kimlarga tatbiq etiladi?

Nizom davlat umumiy o‘rta ta’lim muassasalari o‘quvchilari uchun yagona maktab formasini joriy etish tartibini belgilaydi.

Uning talablari:

davlat umumta’lim maktablari o‘quvchilari uchun majburiy;
ixtisoslashtirilgan san’at va madaniyat maktablari;
olimpiya zaxiralari maktablari va maktab-internatlariga tatbiq etilmaydi.

Yagona maktab formasi — davlat tomonidan tasdiqlangan namuna, rang va texnik talablarga muvofiq o‘quvchilar uchun mo‘ljallangan kiyim.

Qarorda yagona forma tasdiqlangan shakllar asosida bosqichma-bosqich joriy etilishi belgilangan. Maktab ota-onalarga amalda qo‘llanilayotgan namuna va xarid tartibini tushuntirishi kerak.

Forma qanday bo‘lishi kerak?

Forma:

o‘ta tor yoki o‘ta keng bo‘lmasligi;
toza va dazmollangan bo‘lishi;
matosi bolaning yoshi va sanitariya talablariga mos bo‘lishi;
shim pochasi to‘piqdan pastda turishi;
oyoq kiyim poshnasi 3 santimetrdan baland bo‘lmasligi kerak.

Qizlar yubkasining uzunligi tizzadan 5–15 santimetr pastda bo‘lishi belgilangan. Ko‘ylakning eng yuqoridagi bitta tugmasidan tashqari boshqa tugmalari qadalgan bo‘lishi lozim.

Sovuq yoki issiq havoda engillik bormi?

Ob-havoga qarab o‘quvchi:

nimcha yoki kostyumni;
uzun yoki kalta engli ko‘ylakni ixtiyoriy tanlashi mumkin.

Qishki o‘qish davrida qizlarga yagona maktab formasiga mos shim kiyishga ruxsat beriladi.

Tashqi ko‘rinish bo‘yicha qanday talablar bor?

Maktab binosi ichida, maxsus tadbirlardan tashqari, bosh kiyimsiz yurish talab qilinadi. Tasdiqlangan formaga din, konfessiya yoki submadaniyatga mansublikni aks ettiruvchi elementlarni qo‘shishga yo‘l qo‘yilmaydi.

Shuningdek, nizomda o‘quvchilarning:

tananing ochiq qismida tatuirovka yoki pirsing bilan;
sochni yorqin rangga bo‘yab;
ko‘zga tashlanuvchi makiyaj, uzun yoki bo‘yalgan tirnoqlar bilan;
o‘g‘il bolalarning soqol yoki 2–3 santimetrdan uzun soch bilan kelishlariga oid cheklovlar belgilangan.

Formani qaerdan olish haqida kim ma’lumot beradi?

Maktab rahbariyati har yili 1-mayga qadar:

formaning rangli namunasini;
matoning tarkibi va rangi haqidagi ma’lumotni;
uni qaerdan va qanday xarid qilish mumkinligini ko‘rinarli joyga joylashtirishi kerak.

Qoida buzilsa qanday chora ko‘riladi?

Forma talablariga rioya qilmaslik ichki tartib-qoidani buzish deb baholanadi. O‘quvchiga nisbatan:

ogohlantirish;
kundalikka qayd kiritish;
ota-onani xabardor qilish;
masalani ota-ona ishtirokida muhokama qilish choralari qo‘llanishi mumkin.

O‘quvchining maktabga formada kelishini ta’minlash uchun ota-ona mas’ul, talablarga rioya etilishini esa maktab rahbariyati va pedagoglar nazorat qiladi.

Normativ hujjatlar

Vazirlar Mahkamasining 2018-yil 15-avgustdagi 666-son qarori

Maqola foydali bo‘ldimi?

Bo‘limlar