Ҳомиладорлик, туғиш ва бола парвариши учун таътиллар

Ҳомиладорлик ва туғиш таътили

Ўзбекистон Республикасининг Меҳнат кодексига мувофиқ, аёлга:

туғруққача — 70 календарь кун;
туғруқдан кейин — 56 календарь кун;
туғиш қийин кечганда ёки икки ва ундан ортиқ бола туғилганда — туғруқдан кейин 70 календарь кун таътил берилади.

Ҳомиладорлик ва туғиш таътили жамланган ҳолда ҳисобланади ва туғруққача амалда фойдаланилган кунлар сонидан қатъи назар, тўлиқ берилади.

Нафақа қонунчиликда белгиланган миқдорда, лекин ўртача ойлик иш ҳақининг 75 фоизидан кам бўлмаган миқдорда тўланади.

Нафақани тайинлаш

«Давлат ижтимоий суғуртаси тўғрисида»ги Қонунга мувофиқ, вақтинча меҳнатга лаёқатсизлик ҳамда ҳомиладорлик ва туғиш нафақалари суғурталанган шахснинг алоҳида мурожаатисиз проактив шаклда тайинланади.

Нафақани тайинлаш ва тўлашда суғурта стажи ҳамда амалдаги ижтимоий суғурта қоидалари ҳисобга олинади.

Ҳомиладорлик ва туғиш таътили меҳнат кафолати, нафақа эса ушбу даврда даромаднинг ўрнини қоплашга қаратилган ижтимоий суғурта тўловидир.

Бола икки ва уч ёшга тўлгунига қадар таътил

Ҳомиладорлик ва туғиш таътили тугагач, аёлнинг хоҳишига кўра:

бола икки ёшга тўлгунига қадар нафақа тўланадиган бола парваришлаш таътили;
бола уч ёшга тўлгунига қадар иш ҳақи сақланмайдиган қўшимча таътил берилади.

Бола парваришлаш таътилидан тўлиқ ёки қисмларга бўлиб:

боланинг отаси;
бувиси ёки буваси;
болани ҳақиқатда парваришлаётган бошқа қариндоши;
боланинг васийси ҳам фойдаланиши мумкин.

Таътил даврида ишлаш

Бола парваришлаш таътилидаги шахс ўз хоҳишига кўра:

тўлиқсиз иш вақтида;
иш берувчи билан келишиб уйда ишлаши мумкин.

Бунда бола икки ёшга тўлгунига қадар тайинланган нафақани олиш ҳуқуқи сақланади.

Иш жойи ва меҳнат стажи

Бола парваришлаш таътили даврида ходимнинг иш жойи ва лавозими сақланади.

Бундай таътилларнинг жами кўпи билан олти йили умумий меҳнат стажига, шу жумладан мутахассислик бўйича иш стажига қўшилади.

Агар жамоа шартномаси, ички ҳужжат ёки меҳнат шартномасида бошқача қоида белгиланмаган бўлса, бола парваришлаш таътили вақти кейинги йиллик меҳнат таътилига ҳуқуқ берадиган стажга киритилмайди.