Homiladorlik, tug‘ish va bola parvarishi uchun ta’tillar

Homiladorlik va tug‘ish ta’tili

O‘zbekiston Respublikasining Mehnat kodeksiga muvofiq, ayolga:

tug‘ruqqacha — 70 kalendarь kun;
tug‘ruqdan keyin — 56 kalendarь kun;
tug‘ish qiyin kechganda yoki ikki va undan ortiq bola tug‘ilganda — tug‘ruqdan keyin 70 kalendarь kun ta’til beriladi.

Homiladorlik va tug‘ish ta’tili jamlangan holda hisoblanadi va tug‘ruqqacha amalda foydalanilgan kunlar sonidan qat’i nazar, to‘liq beriladi.

Nafaqa qonunchilikda belgilangan miqdorda, lekin o‘rtacha oylik ish haqining 75 foizidan kam bo‘lmagan miqdorda to‘lanadi.

Nafaqani tayinlash

«Davlat ijtimoiy sug‘urtasi to‘g‘risida»gi Qonunga muvofiq, vaqtincha mehnatga layoqatsizlik hamda homiladorlik va tug‘ish nafaqalari sug‘urtalangan shaxsning alohida murojaatisiz proaktiv shaklda tayinlanadi.

Nafaqani tayinlash va to‘lashda sug‘urta staji hamda amaldagi ijtimoiy sug‘urta qoidalari hisobga olinadi.

Homiladorlik va tug‘ish ta’tili mehnat kafolati, nafaqa esa ushbu davrda daromadning o‘rnini qoplashga qaratilgan ijtimoiy sug‘urta to‘lovidir.

Bola ikki va uch yoshga to‘lguniga qadar ta’til

Homiladorlik va tug‘ish ta’tili tugagach, ayolning xohishiga ko‘ra:

bola ikki yoshga to‘lguniga qadar nafaqa to‘lanadigan bola parvarishlash ta’tili;
bola uch yoshga to‘lguniga qadar ish haqi saqlanmaydigan qo‘shimcha ta’til beriladi.

Bola parvarishlash ta’tilidan to‘liq yoki qismlarga bo‘lib:

bolaning otasi;
buvisi yoki buvasi;
bolani haqiqatda parvarishlayotgan boshqa qarindoshi;
bolaning vasiysi ham foydalanishi mumkin.

Ta’til davrida ishlash

Bola parvarishlash ta’tilidagi shaxs o‘z xohishiga ko‘ra:

to‘liqsiz ish vaqtida;
ish beruvchi bilan kelishib uyda ishlashi mumkin.

Bunda bola ikki yoshga to‘lguniga qadar tayinlangan nafaqani olish huquqi saqlanadi.

Ish joyi va mehnat staji

Bola parvarishlash ta’tili davrida xodimning ish joyi va lavozimi saqlanadi.

Bunday ta’tillarning jami ko‘pi bilan olti yili umumiy mehnat stajiga, shu jumladan mutaxassislik bo‘yicha ish stajiga qo‘shiladi.

Agar jamoa shartnomasi, ichki hujjat yoki mehnat shartnomasida boshqacha qoida belgilanmagan bo‘lsa, bola parvarishlash ta’tili vaqti keyingi yillik mehnat ta’tiliga huquq beradigan stajga kiritilmaydi.

Maqola foydali bo‘ldimi?

Bo‘limlar