Ҳайвонот дунёси объектларидан умумий ва махсус фойдаланиш

Нималар ҳайвонот дунёси объекти ҳисобланади?

Ҳайвонот дунёси объектларига:

сут эмизувчилар, қушлар, судралиб юрувчилар, сувда ва қуруқликда яшовчилар, балиқлар, умуртқасизлар ва уларнинг популяциялари;
ёввойи ҳайвонлардан ташкил топган табиий гуруҳлар;
камёб ва йўқолиб кетиш хавфи остидаги турлар;
ёввойи ҳайвонларнинг ҳаёт фаолияти маҳсулотлари киради.

Табиий эркинликда яшаётган ҳамда табиий яшаш муҳитига қўйиб юборилган ёввойи ҳайвонлар давлат мулки ҳисобланади.

Умумий фойдаланиш нима?

Жисмоний шахслар ҳайвонот дунёси объектларидан ҳайвонларни табиий муҳитдан ажратиб олмасдан ва уларга ҳамда яшаш муҳитига зарар етказмасдан умумий тарзда фойдаланиши мумкин.

Бундай умумий фойдаланиш, қоида тариқасида, бепул ва махсус рухсатномасиз амалга оширилади. Спорт ва ҳаваскорлик мақсадида балиқ овлашга оид махсус қоидалар бундан мустасно.

Махсус фойдаланиш қачон юзага келади?

Ёввойи ҳайвонларни табиий муҳитдан ажратиб олиш билан боғлиқ фойдаланиш махсус фойдаланиш ҳисобланади.

Бунга, жумладан:

ов қилиш;
балиқ овлаш;
ёввойи ҳайвонларни кўчириш ёки иқлимлаштириш;
илмий ва назорат мақсадларида фойдаланиш;
ҳайвонлар ҳаёт фаолияти маҳсулотларини олиш;
ҳайвонларни ярим эркин ёки сунъий шароитларда сақлаш каби фаолиятлар киради.

Махсус фойдаланиш тасдиқланган квоталар доирасида ва қонунчиликда назарда тутилган ҳолларда рухсатнома ҳамда тўлов асосида амалга оширилади.

Ҳар қандай ҳайвонни тутиш учун рухсатнома керакми?

Питомникларда ва ҳовуз хўжаликларида етиштирилган ҳамда шу хўжалик ҳудудидаги ҳайвонларни тутиш учун рухсатнома талаб этилмайди.

Табиий муҳитдаги ёввойи ҳайвонларга нисбатан эса тегишли квота, рухсатнома ва ҳайвон турига қараб махсус талаблар қўлланилади.

Тўлов қилинса, бошқа мажбуриятлар бекор бўладими?

Йўқ. Ҳайвонот дунёсидан махсус фойдаланганлик учун тўлов қилиш фойдаланувчини ёввойи ҳайвонларни ва уларнинг яшаш муҳитини муҳофаза қилиш, такрор кўпайтириш ва биотехник тадбирларни бажариш мажбуриятларидан озод қилмайди.

Муҳофаза этиладиган табиий ҳудудларда ҳайвонот дунёсидан фойдаланиш шу ҳудуд учун белгиланган махсус режимга мувофиқ амалга оширилади.

Эслатма: ер ёки сув объектига эгалик қилишнинг ўзи ундаги ёввойи ҳайвонларни тутиш ёки овлаш ҳуқуқини бермайди. Ёввойи ҳайвонлардан фойдаланиш ҳуқуқи ер ва сувдан фойдаланиш ҳуқуқидан алоҳида тартибга солинади.