Яйловлар тўғрисида

Яйловлар муҳофазаси учун – махсус стратегия | NORMA.UZ

Яйловдан ким фойдаланиши мумкин?

Яйлов — чорва моллари учун озуқа бўладиган табиий ўсимлик қопламига эга ер. Жисмоний ва юридик шахслар яйловлардан ер участкасини ижарага, шу жумладан иккиламчи ижарага олиш орқали фойдаланиши мумкин.

Яйлов ерларининг ижара ҳуқуқи жисмоний ва юридик шахсларга электрон онлайн-аукцион орқали берилиши мумкин.

Фойдаланишдан чиқиб кетган айрим яйловлар инвестиция шартномаси ёки давлат-хусусий шериклик асосида қишлоқ хўжалиги ишлаб чиқариши учун камида 3 йилдан 49 йилгача ижарага берилиши мумкин.

Яйловдан қандай фойдаланиш керак?

Чорва молларини ўтлатиш ва пичан ўриш яйлов тури, майдони, ўтлатиладиган чорва тури ва сонига қараб белгиланадиган меъёр ҳамда муддатларга мувофиқ амалга оширилади.

Яйловдан фойдаланувчи:

ердан белгиланган мақсадда оқилона фойдаланиши;
ўсимлик қопламини тиклаш ва таназзулга учрашининг олдини олиши;
яйловлар алмашинишига риоя қилиши;
ёнғинларнинг олдини олиши;
зараркунанда ва касалликларга қарши чора кўриши шарт.

Яйлов учун қандай ҳақ тўланади?

Яйловдан фойдаланганлик учун тўлов ер солиғи ёки ижара ҳақи шаклида ундирилади.

2026 йилда қандай янги имконият жорий этилди?

ПФ–83-сон Фармон доирасида фойдаланишга киритиладиган айрим лалми ва яйлов ер участкалари ер тузиш лойиҳаси ва техник-иқтисодий асос билан бирга E-auksion савдоларига чиқарилади. Ерни фойдаланишга киритиш муддати уни ажратилган кундан бошлаб кўпи билан 2 йил этиб белгиланади.

Ушбу механизм доирасида «Агробанк» орқали ерларни фойдаланишга киритиш учун 10 йил муддатга, 4 йиллик имтиёзли давр билан, йиллик 14 фоиз ставкада, ҳар гектарга 20 млн сўмгача кредит ажратиш назарда тутилган.

Агар ер белгиланган муддатда фойдаланишга киритилмаса, бу ундан оқилона фойдаланилмаган деб баҳоланиши ва ерга бўлган ҳуқуқни бекор қилиш, имтиёзли кредит шартларини ўзгартириш ҳамда берилган субсидия ва имтиёзларни бекор қилишга олиб келиши мумкин.

Яйловдан фойдаланиш ҳуқуқи қачон тугатилиши мумкин?

Жумладан, ижара муддати тугаганда, ер бошқа мақсадда ёки оқилона фойдаланилмаганда, жамоат эҳтиёжлари учун олиб қўйилганда ёки фойдаланувчи ихтиёрий равишда воз кечганда яйловдан фойдаланиш ҳуқуқи тугатилиши мумкин.

Эслатма: яйловни ижарага олиш уни чекловсиз ўтлатиш ҳуқуқини бермайди. Чорва сони, фойдаланиш муддати ва яйловлар алмашиниши бўйича белгиланган меъёрларга риоя қилиш керак.