Талабаларга ижара тўловининг бир қисмини қоплаб бериш тартиби

Талабаларга ижара тўловининг бир қисмини қоплаб бериш тартиби белгиланди

Кимларга ижара пули қоплаб берилади?

Қоплаб бериш давлат олий таълим муассасасида кундузги таълим шаклида ўқийдиган, талабалар турар жойи билан таъминланмаган ва ўзига ёки ота-онасига, қонуний вакилига тегишли бўлмаган уйда ижара асосида яшайдиган талабаларга татбиқ этилади.

Давлат гранти ёки тўлов-контракт асосида ўқиш аҳамиятга эга эмас. Бироқ хорижий олий таълим ташкилотлари билан қўшма дастур ёки факультетларда ўқиётган талабалар ушбу тартибга кирмайди. Давлат бюджети ҳисобидан ижарада яшайдиган талабаларнинг 60 фоизига тўлов ажратилади.

Ижара тўловини қоплаб бериш — талабанинг ойлик уй ижараси харажатининг белгиланган қисмини давлат бюджети ҳисобидан қайтариш.

Қанча миқдорда тўланади?

Ижара шартномасида кўрсатилган сумма қанча бўлишидан қатъи назар:

Тошкент шаҳрида — базавий ҳисоблаш миқдорининг 1 баравари;
бошқа ҳудудларда — базавий ҳисоблаш миқдорининг 0,5 баравари миқдорида қоплаб берилади.

Тўлов биринчи навбатда эҳтиёжманд оилалар фарзандлари, ўрнак кўрсатган ва ижтимоий фаол талабаларга ажратилади.

Ижара шартномасига қандай талаблар қўйилади?

Ижара шартномаси солиқ органларида ҳисобга қўйилган бўлиши керак. У ҳақдаги маълумотлар ijara.soliq.uz платформасидан автоматик олинади.

Битта хонадонда икки ёки ундан ортиқ талаба яшаса, уларнинг барчаси шартномада кўрсатилиши шарт. Талабанинг доимий рўйхатдан ўтган манзили билан бир туман ёки шаҳардаги уй учун компенсация берилмайди.

Биринчи босқич талабаларидан сентябрь ва октябрь ойлари учун ижара шартномаси талаб қилинмайди. Ноябрь ойидан тўлов давом этиши учун ижара шартномаси расмийлаштирилиши керак.

Қандай ариза берилади?

Талаба ҳар ой:

исталган Давлат хизматлари марказига;
Ягона интерактив давлат хизматлари портали орқали;
Олий таълим, фан ва инновациялар вазирлигининг махсус электрон платформаси орқали мурожаат қилиши мумкин.

Сўровнома электрон шаклда тўлдирилади. Ижара шартномаси маълумотлари солиқ тизимидан автоматик олингани сабабли уни ҳар сафар қоғоз шаклида тақдим этиш талаб қилинмайди.

Ариза қачон кўриб чиқилади?

Ариза ҳар ойнинг 1-санасидан 7-санасига қадар берилади.

Кейин:

7–13-саналарда олий таълим муассасаси комиссияси маълумотларни ўрганади;
14-санагача комиссия ва ректор қарорни тасдиқлайди;
15-санагача бухгалтерия тўловни амалга оширади.

Қоплаб бериш ўқув йили давомида — одатда 1 сентябрдан 1 июлгача ёки таълим дастурининг давомийлигига мувофиқ амалга оширилади.

Қайси ҳолатларда тўлов берилмайди ёки тўхтатилади?

Қоплаб бериш:

талабанинг ўзига ёки ота-онасига тегишли уй ижарага олинганда;
талаба ижара шартномасида кўрсатилган манзилда амалда яшамаганда;
нотўғри ёки сохта маълумот тақдим этилганда;
ижара шартномаси белгиланган тартибда расмийлаштирилмаганда рад этилиши мумкин.

Талаба академик таътилга чиқса, курсда қолдирилса ёки талабалар сафидан четлаштирилса, тўлов тўхтатилади.