Talabalarga ijara to‘lovining bir qismini qoplab berish tartibi

Talabalarga ijara to‘lovining bir qismini qoplab berish tartibi belgilandi

Kimlarga ijara puli qoplab beriladi?

Qoplab berish davlat oliy ta’lim muassasasida kunduzgi ta’lim shaklida o‘qiydigan, talabalar turar joyi bilan ta’minlanmagan va o‘ziga yoki ota-onasiga, qonuniy vakiliga tegishli bo‘lmagan uyda ijara asosida yashaydigan talabalarga tatbiq etiladi.

Davlat granti yoki to‘lov-kontrakt asosida o‘qish ahamiyatga ega emas. Biroq xorijiy oliy ta’lim tashkilotlari bilan qo‘shma dastur yoki fakulьtetlarda o‘qiyotgan talabalar ushbu tartibga kirmaydi. Davlat byudjeti hisobidan ijarada yashaydigan talabalarning 60 foiziga to‘lov ajratiladi.

Ijara to‘lovini qoplab berish — talabaning oylik uy ijarasi xarajatining belgilangan qismini davlat byudjeti hisobidan qaytarish.

Qancha miqdorda to‘lanadi?

Ijara shartnomasida ko‘rsatilgan summa qancha bo‘lishidan qat’i nazar:

Toshkent shahrida — bazaviy hisoblash miqdorining 1 baravari;
boshqa hududlarda — bazaviy hisoblash miqdorining 0,5 baravari miqdorida qoplab beriladi.

To‘lov birinchi navbatda ehtiyojmand oilalar farzandlari, o‘rnak ko‘rsatgan va ijtimoiy faol talabalarga ajratiladi.

Ijara shartnomasiga qanday talablar qo‘yiladi?

Ijara shartnomasi soliq organlarida hisobga qo‘yilgan bo‘lishi kerak. U haqdagi ma’lumotlar ijara.soliq.uz platformasidan avtomatik olinadi.

Bitta xonadonda ikki yoki undan ortiq talaba yashasa, ularning barchasi shartnomada ko‘rsatilishi shart. Talabaning doimiy ro‘yxatdan o‘tgan manzili bilan bir tuman yoki shahardagi uy uchun kompensatsiya berilmaydi.

Birinchi bosqich talabalaridan sentyabrь va oktyabrь oylari uchun ijara shartnomasi talab qilinmaydi. Noyabrь oyidan to‘lov davom etishi uchun ijara shartnomasi rasmiylashtirilishi kerak.

Qanday ariza beriladi?

Talaba har oy:

istalgan Davlat xizmatlari markaziga;
Yagona interaktiv davlat xizmatlari portali orqali;
Oliy ta’lim, fan va innovatsiyalar vazirligining maxsus elektron platformasi orqali murojaat qilishi mumkin.

So‘rovnoma elektron shaklda to‘ldiriladi. Ijara shartnomasi ma’lumotlari soliq tizimidan avtomatik olingani sababli uni har safar qog‘oz shaklida taqdim etish talab qilinmaydi.

Ariza qachon ko‘rib chiqiladi?

Ariza har oyning 1-sanasidan 7-sanasiga qadar beriladi.

Keyin:

7–13-sanalarda oliy ta’lim muassasasi komissiyasi ma’lumotlarni o‘rganadi;
14-sanagacha komissiya va rektor qarorni tasdiqlaydi;
15-sanagacha buxgalteriya to‘lovni amalga oshiradi.

Qoplab berish o‘quv yili davomida — odatda 1 sentyabrdan 1-iyulgacha yoki ta’lim dasturining davomiyligiga muvofiq amalga oshiriladi.

Qaysi holatlarda to‘lov berilmaydi yoki to‘xtatiladi?

Qoplab berish:

talabaning o‘ziga yoki ota-onasiga tegishli uy ijaraga olinganda;
talaba ijara shartnomasida ko‘rsatilgan manzilda amalda yashamaganda;
noto‘g‘ri yoki soxta ma’lumot taqdim etilganda;
ijara shartnomasi belgilangan tartibda rasmiylashtirilmaganda rad etilishi mumkin.

Talaba akademik ta’tilga chiqsa, kursda qoldirilsa yoki talabalar safidan chetlashtirilsa, to‘lov to‘xtatiladi.