Таълим кредити

<span class=data-keyword><span class=data-keyword>Таълим</span></span> кредити: янгиликлар ва ўзгаришлар - Ўзбекистон Республикаси Марказий банкининг молиявий саводхонлик бўйича ахборот-таълим веб-сайти

Таълим кредити кимларга берилади

Таълим кредити Ўзбекистондаги давлат, нодавлат ва хорижий таълим ташкилотлари ҳамда уларнинг филиалларида тўлов-контракт асосида кундузги таълим шаклида ўқиётган Ўзбекистон фуқароларига берилади.

Кредит:

талабанинг ўзига;
унинг ота-онасига;
васийсига;
доимий даромадга эга оила аъзоси ёки бошқа биргаликда қарз олувчига расмийлаштирилиши мумкин.

Маблағ талаба қўлига берилмайди, балки банк томонидан таълим ташкилотининг ҳисобварағига ўтказилади.

Муҳим: таълим кредити, қоида тариқасида, сиртқи, кечки ва масофавий таълим шакллари учун ажратилмайди.

Кредит миқдори

Биринчи босқич талабаларига таълим кредити тўлов-контракт суммаси миқдорида ажратилади.

Иккинчи ва ундан юқори босқичда:

GPA 3 дан паст бўлса — контрактнинг кўпи билан 80 фоизи ажратилади; дастлабки 20 фоиз талаба томонидан тўланади;
GPA 3 ва ундан юқори бўлса — контрактнинг тўлиқ суммаси миқдорида кредит ажратилади;
Ижтимоий реестрга киритилган оила аъзосига контрактнинг тўлиқ суммаси миқдорида кредит ажратилиши мумкин.

Ижтимоий реестрга киритилган оила талабасининг GPA кўрсаткичи 3,5 ва ундан юқори бўлса, кейинги ўқув йили учун фоизсиз таълим кредити ажратилади.

Фоиз ставкаси

Умумий тартибда таълим кредити Марказий банкнинг асосий ставкаси миқдорида берилади.

Асосий ставка пасайса, кредит ставкаси ҳам мутаносиб равишда пасаяди. Асосий ставка оширилса, аввал расмийлаштирилган кредит ставкаси ўзгаришсиз қолади.

Хотин-қизларга таълим кредити 14 фоиз ставкасида ажратилади ва ушбу фоиз тўловлари Таълим кредитини молиялаштириш жамғармаси маблағлари ҳисобидан қопланади.

Кредитни қайтариш

Таълим кредитининг асосий қарзи талабанинг расмий ўқиш муддати тугаганидан кейин еттинчи ойдан бошлаб етти йил давомида қайтарилади.

Кредитни муддатидан олдин қайтариш мумкин. Банк муддатидан олдин қайтарилгани учун комиссия ёки неустойка талаб қилиши мумкин эмас.

Эътибор беринг: фоизларни ҳисоблаш кредит маблағи таълим ташкилотига ўтказилган кундан бошланади. Асосий қарз учун имтиёзли давр фоизларни тўлашдан автоматик равишда озод қилмайди.

Таъминот ва кафиллик

Банк кредит қайтарилишини таъминлаш учун кафиллик, гаров ёки суғурта полисини талаб қилиши мумкин.

Ижтимоий реестрга киритилган оилаларнинг талабалари, шу жумладан хотин-қизларидан таълим кредити учун гаров ва кафиллик талаб қилинмайди.

Ариза бериш

Таълим кредити учун:

тижорат банкига;
Таълим кредити ахборот тизими;
ЯИДХП орқали мурожаат қилиш мумкин.

Банк ариза ва ҳужжатларни беш иш куни ичида кўриб чиқади. Кредит рад этилса, ариза берувчига рад этишнинг аниқ сабаблари кўрсатилган жавоб берилиши шарт.