Аҳоли пунктларида итлар ва мушукларни сақлаш қоидалари

Итни қачон рўйхатдан ўтказиш ва эмлаш керак?

Аҳоли пунктларида сақланаётган итлар белгиланган тартибда рўйхатдан ўтказилади ва ҳар йили қайта рўйхатдан ўтказилади. Рўйхатдан ўтказиш ит қутуришга қарши дастлабки эмланганда амалга оширилади ва унга ветеринария паспорти расмийлаштирилади.

Итлар 3 ойлик ёшдан бошлаб қутуришга қарши эмланади. Янги сотиб олинган ёки олинган, аввал қачон эмлангани номаълум бўлган ит 1 ҳафта ичида қутуришга қарши эмланиши, ветеринария паспорти олиниши ва рўйхатдан ўтказилиши керак.

Квартира ёки ҳовлида нечта ҳайвон сақлаш мумкин?

Кўп квартирали уйнинг алоҳида квартирасида қўшнилар ҳамда уй-жой мулкдорлари бошқарув органининг розилиги билан 1 та ит ва 1 та мушукдан ошмаган миқдорда ҳайвон сақлашга рухсат этилади.

Алоҳида ҳовлида ит боғланган ҳолда ёки унинг чиқиб кетишига йўл қўймайдиган ўралган ҳудудда сақланиши керак. Итнинг соат 08:00 гача ва 22:00 дан кейин узлуксиз вовуллашига йўл қўймаслик лозим.

Итни қандай сайр қилдириш керак?

Итни олиб чиқишда унинг қочиб кетиши ёки одамлар ва бошқа ҳайвонларга ҳужум қилишига йўл қўймаслик шарт.

Очиқ ҳудудда ит тумшуқбоғда ва узунлиги 2 метрдан ошмайдиган етакловда, жамоат жойларида эса узунлиги 1 метрдан ошмайдиган етакловда олиб юрилади. Итни тумшуқбоғсиз ва етакловсиз фақат махсус ажратилган майдончаларда сайр қилдириш мумкин.

Маст ҳолатдаги шахсларга ва 14 ёшга тўлмаган болаларга итни сайр қилдириш тақиқланади.

Ит ва мушукни жамоат транспортида олиб юриш мумкинми?

Ҳайвонларни жамоат транспортида олиб юришга нисбатан умумий чеклов мавжуд. Бироқ кичик итлар ва мушукларни уларнинг чиқиб кетишига йўл қўймайдиган ҳамда бошқа йўловчиларга халақит бермайдиган хавфсиз кўчма қурилма, контейнер ёки бошқа мосламада жамоат транспортида олиб юришга рухсат этилади.

Шунингдек, ҳайвонларни озиқ-овқат маҳсулотлари сотиладиган савдо ва умумий овқатланиш жойларига олиб кириш ҳамда белгиланмаган жойларда ювиш каби ҳаракатларга йўл қўйилмайди.

Эслатма: кичик ит ва мушукларни жамоат транспортида олиб юриш мутлақ тақиқланмаган. Улар хавфсиз кўчма қурилмада бўлиши ва бошқа йўловчиларга халақит бермаслиги шарт.

Ҳайвон эгасининг қандай мажбуриятлари бор?

Ҳайвон эгаси:

одамлар ва бошқа ҳайвонлар хавфсизлигини таъминлаши;
ҳайвоннинг узлуксиз шовқин қилиб қўшниларга халақит беришининг олдини олиши;
уйнинг умумий фойдаланиш жойлари, йўлаклар, лифтлар, болалар майдончалари ва бошқа жамоат жойларини ифлослантирмаслиги;
ҳайвон қолдирган ахлатни дарҳол тозалаши ва сайр вақтида бунинг учун зарур воситаларни ўзи билан олиб юриши;
итни ўз вақтида рўйхатдан ва қайта рўйхатдан ўтказиши;
ветеринария кўриги ва профилактик эмлаш учун ҳайвонни белгиланган вақтда олиб бориши керак.

Кўча ва бошқа жамоат жойларида қаровсиз юрган ит ва мушуклар, ҳатто уларда бўйинбоқ, жетон ёки тумшуқбоғ бўлса ҳам, белгиланган тартибда тутилиши мумкин.

Қоидаларни бузганлик учун қандай жавобгарлик бор?

Ҳайвонларни сақлаш қоидаларини бузганлик учун:

фуқароларга — 3 БҲМдан 5 БҲМгача;
мансабдор шахсларга — 5 БҲМдан 10 БҲМгача жарима солиниши мумкин.

Агар шу ҳуқуқбузарлик одамлар соғлиғига зарар етказса ёки жисмоний ёхуд юридик шахснинг мол-мулкига шикаст етказса ва қилмиш жиноят аломатларини ташкил этмаса:

фуқароларга — 10 БҲМдан 15 БҲМгача;
мансабдор шахсларга — 15 БҲМдан 30 БҲМгача жарима қўлланилиши мумкин.