Мастлик ҳолатида бўлган шахсларга туманлараро тиббий ёрдам кўрсатиш пунктлари

Мастлик ҳолатидаги шахсларга тиббий ёрдам кўрсатиш пунктлари

Алкоголь, гиёҳвандлик воситалари ёки бошқа психоактив моддалар таъсирида маст бўлиб, мустақил ҳаракатланиш қобилиятини йўқотган ёки қаердалигини англай олмайдиган шахсларга тиббий ёрдам кўрсатиш учун туман ва шаҳар тиббиёт бирлашмалари таркибида камида 10 ўринли туманлараро пунктлар ташкил этилади.

Пунктлар видеокузатув камералари билан жиҳозланиши, ички режим ва жамоат тартиби эса Ички ишлар вазирлиги ҳузуридаги Қўриқлаш департаменти бўлинмалари томонидан таъминланиши лозим.

Қайси шахслар пунктга олиб борилиши мумкин?

Ички ишлар органлари ходимлари жамоат жойидаги маст шахсни пунктга олиб боришда қуйидаги ҳолатларни ҳисобга олади:

мустақил ёки мақсадли ҳаракат қила олмаслик;
қаттиқ уйқучанлик ва уйғотиш қийинлиги;
тик ҳолатда мустақил тура олмаслик;
нутқнинг ноаниқ ва тушунарсиз бўлиши;
саволларни яхши тушунмаслик ёки қаердалигини англай олмаслик.

Яшаш жойидан шахсни мазкур пунктга олиб бориш ушбу умумий жамоат жойи механизмига кирмайди.

Эслатма: алкоголь ёки бошқа психоактив моддалардан оғир заҳарланиш, ҳушсизлик ёки кома ҳолати ушбу пункт тартибига кирмайди. Бундай ҳолатда шошилинч тиббий ёрдам талаб этилади.

Шахсни ким олиб боради?

Мастлик ҳолатидаги шахсни ички ишлар органлари ходимлари аниқлайди ва тиббий кўрсатма мавжуд бўлса хизмат автомашинасида пунктга етказади.

Агар шахс ҳушсиз бўлса, оғир тан жароҳати олган бўлса ёки ҳаёти ва соғлиғига бошқа жиддий хавф мавжуд бўлса, ички ишлар ходими зудлик билан тез тиббий ёрдам бригадасини чақиради. Тез ёрдам етиб келиш имкони бўлмаса, шахс тиббиёт муассасасига хизмат автомобилида етказилади.

Пунктда қандай тиббий ёрдам кўрсатилади?

Пунктнинг вазифаларига:

шахсни ҳушёр ҳолатга келтириш бўйича тиббий ёрдам;
кеча-кундуз қабул қилиш ва ҳисобини юритиш;
хавфсиз ва соғлиғига зиён етмайдиган шароитда сақлаш;
жароҳат, куйиш, инсульт ёки бошқа шошилинч ҳолат аниқланса, тегишли тиббиёт муассасасига юбориш киради.

Шахс пунктда 12 соатгача бўлса далолатнома расмийлаштирилади. У 12 соатдан кўп қолса ва тиббий кўрсатма мавжуд бўлса, касаллик тарихи юритилади.

Шахс қачон чиқарилади?

Тиббий ёрдам кўрсатилиб, шахс ҳушёр ҳолатга келтирилгандан кейин шифокор уни қайта кўрикдан ўтказади ва чиқариш мумкинлиги ҳақида хулоса беради.

Ҳушёр ҳолатга келтириш муддати 3 соатдан кам бўлмаслиги керак.

Агар шахс 23:00 дан 06:00 гача бўлган тунги вақтда ёки йилнинг совуқ даврида чиқарилса, у қариндошлари кузатуви остида чиқарилади.

Пунктга олиб келинган шахснинг қандай ҳуқуқлари бор?

Шахс:

хавфсиз ва соғлиғига зарар етмайдиган шароитда сақланиш;
зарур тиббий ёрдам олиш;
пунктга олиб келингани ҳақида қариндошлари ёки бошқа шахсларга хабар бериш;
белгиланган ижтимоий-маиший шароитлардан фойдаланиш ҳуқуқига эга. Чиқаришда вақтинча олиб қўйилган ҳужжатлар, пул ва бошқа буюмлар белгиланган тартибда қайтарилади.

Норматив ҳужжатлар

Ўзбекистон Республикаси Вазирлар Маҳкамасининг қарори, 01.12.2025 йилдаги 754-сон