Умумий ўрта таълим тўғрисидаги электрон шаҳодатнома

Электрон шаҳодатнома нима

Умумий ўрта таълим тўғрисидаги электрон шаҳодатнома — 9 ёки 11-синфни тамомлаган битирувчининг умумий ўрта таълим олганини тасдиқловчи давлат намунасидаги электрон ҳужжат.

Шаҳодатнома махсус электрон платформада ўзбек ва инглиз тилларида шакллантирилади.

Битирувчи — 9 ёки 11-синфни тамомлаган, барча фанлардан ижобий йиллик баҳолар олган ва давлат якуний аттестациясидан ўтган ўқувчи.

Электрон шаҳодатнома — махсус ахборот тизимида шакллантирилган ва QR-код билан тасдиқланган расмий таълим ҳужжати.

Электрон шаҳодатнома турлари

9-синф битирувчиларига:

— таянч ўрта таълим тўғрисидаги оддий шаҳодатнома;

— таянч ўрта таълим тўғрисидаги аъло даражали шаҳодатнома берилади.

11-синф битирувчиларига:

— умумий ўрта таълим тўғрисидаги оддий шаҳодатнома;

— кумуш медаль билан умумий ўрта таълим тўғрисидаги шаҳодатнома;

— олтин медаль билан умумий ўрта таълим тўғрисидаги шаҳодатнома берилади.

Ақлий ривожланишида нуқсони бўлган болалар учун ихтисослаштирилган таълим муассасалари битирувчиларига алоҳида намунадаги шаҳодатнома берилади.

Шаҳодатнома қандай шакллантирилади

Электрон шаҳодатнома синф журнали ёки электрон журналдаги йиллик баҳолар, давлат якуний аттестацияси натижалари ва педагогик кенгаш қарори асосида шакллантирилади.

Таълим муассасаси:

— 1 декабргача битирувчилар ҳақидаги маълумотларни электрон платформага киритади;

— 25 майгача маълумотларни янгилайди;

— 30 майгача киритилган маълумотларни текширади;

— 15 июнгача педагогик кенгаш қарорини расмийлаштиради;

— 20 июнгача якуний баҳоларни киритиб, директор тасдиғини таъминлайди.

Шаҳодатноманинг ҳақиқийлиги

Таълим муассасаси директори электрон шаҳодатномадаги маълумотларни тасдиқлаганидан сўнг, унга автоматик равишда QR-код қўйилади.

Директор томонидан тасдиқланмаган ёки QR-кодга эга бўлмаган электрон шаҳодатнома ҳақиқий ҳисобланмайди.

Директор тасдиқлаганидан кейин шаҳодатномадаги маълумотларни оддий тартибда ўзгартиришга йўл қўйилмайди.

QR-код — электрон шаҳодатноманинг ҳақиқийлигини текшириш имконини берувчи махсус график код.

Шаҳодатномани олиш

Электрон шаҳодатнома битирувчига, қоида тариқасида, 20 июнгача берилади.

Битирувчи шаҳодатномани шахсини тасдиқловчи ҳужжат, паспорт ёки туғилганлик ҳақидаги гувоҳнома маълумотлари орқали электрон платформадан бепул юклаб олиши мумкин.

Шаҳодатноманинг чоп этилган нусхаси йўқолса ёки яроқсиз ҳолга келса, дубликат олиш талаб этилмайди. Электрон шаҳодатномани платформадан яна бепул юклаб олиш мумкин.

Хатоларни тузатиш ва дубликат олиш

Агар шаҳодатномадаги маълумотларда хато аниқланса, битирувчи тегишли мактабга мурожаат қилиши мумкин.

Жорий йил битирувчисининг маълумотларидаги хато 1 октябргача аниқланса, у электрон платформа орқали тузатилади ва янгиланган шаҳодатнома дубликат ҳисобланмайди.

Шаҳодатноманинг расмий маълумотлари шикастланган ёки битирувчининг фамилияси, исми ёхуд отасининг исми қонуний равишда ўзгарган бўлса, дубликат олиш учун белгиланган давлат хизмати орқали мурожаат қилинади.

Дубликат — аввал берилган расмий ҳужжат ўрнига белгиланган тартибда қайта берилган тенг юридик кучга эга ҳужжат.

Норматив ҳужжатлар

Вазирлар Маҳкамасининг 2023 йил 31 январдаги 44-сон қарори — «Умумий ўрта таълим тўғрисидаги электрон шаҳодатноманинг давлат намунасини тасдиқлаш ҳақида»