Давлат ҳокимияти ва бошқаруви органлари фаолиятининг очиқлиги тўғрисида

Очиқликнинг асосий принциплари

Давлат ҳокимияти ва бошқаруви органлари фаолиятининг очиқлиги қуйидаги принципларга асосланади:

ахборотдан ҳамманинг фойдаланиши мумкинлиги;
ахборотнинг ўз вақтида тақдим этилиши ва ишончлилиги;
давлат органлари фаолиятининг ошкоралиги ва шаффофлиги;
ахборотни излаш, олиш ва тарқатиш эркинлиги;
шахснинг шаъни, қадр-қиммати, шахсий ҳаёти ва ишчанлик обрўсини ҳимоя қилиш.

Очиқ ахборот таркиби

Давлат органлари фаолияти тўғрисидаги ахборотга, жумладан:

орган ва унинг ҳудудий бўлинмаларининг ҳуқуқий мақомини белгиловчи ҳужжатлар;
қабул қилинган норматив-ҳуқуқий ва бошқа ҳужжатлар;
ҳужжатларнинг ижро этилиши ҳақидаги маълумотлар;
ҳужжатларга киритилган ўзгартишлар ва уларнинг ўз кучини йўқотгани ҳақидаги маълумотлар;
давлат дастурлари, танловлар ва кимошди савдолари ҳақидаги ахборот;
бўш иш ўринлари ва ишга қабул қилиш шартлари;
ариза, таклиф, шикоят ва ахборот сўровларини қабул қилиш тартиби;
давлат органининг иш тартиби, манзили ва алоқа маълумотлари киради.

Фойдаланилиши қонун билан чекланган ахборот, давлат сирлари ва шахсга доир маълумотлар умумий тартибда ошкор этилмайди.

Очиқликни таъминлаш усуллари

Давлат органлари очиқликни:

расмий нашрлар;
расмий веб-сайтлар;
оммавий ахборот воситалари;
ахборот хизматларининг хабарлари;
матбуот анжуманлари ва брифинглар;
очиқ ҳайъат мажлислари;
ахборот стендлари;
оғзаки, ёзма ёки электрон сўровларга жавоб бериш орқали таъминлайди.

Муҳим: давлат органининг расмий веб-сайтидаги ахборотга сана қўйилиши ва у камида ҳафтасига бир марта янгиланиши керак. Расмий веб-сайтдаги ахборот ишончли бўлиши ва давлат тилида жойлаштирилиши шарт.

Ахборот сўровини юбориш

Ахборот сўрови давлат органига ёки унинг мансабдор шахсига:

оғзаки;
ёзма;
электрон ҳужжат шаклида юборилиши мумкин.

Жисмоний шахс сўровида фамилияси, исми, отасининг исми, яшаш жойи ва сўровнинг мазмунини кўрсатади. Юридик шахс сўровида унинг тўлиқ номи, почта манзили ва сўров мазмуни баён этилади.

Фойдаланувчини аниқлаш имконини бермайдиган аноним сўров кўриб чиқилмайди.

Сўровни кўриб чиқиш муддатлари

Ахборотдан фойдаланувчининг сўрови рўйхатдан ўтказилган кундан бошлаб кўпи билан 15 кун ичида кўриб чиқилади.

ОАВнинг давлат органи фаолияти ҳақида ахборот олиш ёки мансабдор шахс интервьюсини ташкил этиш тўғрисидаги сўрови кўпи билан 7 кун ичида кўриб чиқилади.

Агар сўровни кўриб чиқиш орган ваколатига кирмаса, у тегишли ваколатли органга 3 иш куни ичида юборилади ва фойдаланувчи бу ҳақда хабардор қилинади.

Сўров рад этилса, фойдаланувчига рад этиш сабаблари кўрсатилган асослантирилган жавоб юборилиши шарт.

Шикоят қилиш

Ахборот берилмаса, муддат бузилса ёки асоссиз рад жавоби берилса, фойдаланувчи:

юқори турувчи давлат органига;
прокуратура органларига;
судга шикоят қилиши мумкин.
«Давлат ҳокимияти ва бошқаруви органлари фаолиятининг очиқлиги тўғрисида»ги Қонун
Ўзбекистон Республикаси Конституцияси