14 ёшга тўлган ва 30 ёшдан ошмаган, яъни 31 ёшга тўлмаган ёшларга «Ёшлар дафтари» жамғармаси маблағлари ҳисобидан жарроҳлик амалиётисиз даволаниш ва жарроҳлик амалиёти харажатларини қоплаш учун ижтимоий ёрдам ажратилиши мумкин.

Мазкур ёрдам:

• Ижтимоий реестрга киритилган оилалар аъзоларига;
• оила аъзоларининг ҳар бирига тўғри келадиган ойлик даромади минимал истеъмол харажатлари миқдорининг 2 бараваридан ошмайдиган оилалар аъзоларига

берилади.

Ушбу ёрдам тури айни бир ариза берувчига бир йилда бир марта ажратилади.

Қанча миқдорда маблағ ажратилади?

Даволаниш турига қараб қуйидаги миқдорда маблағ ажратилади:

• жарроҳлик амалиётисиз даволаниш учун — базавий ҳисоблаш миқдорининг 50 бараваригача;
• жарроҳлик амалиётини ўтказиш учун — Давлат тиббий суғуртаси жамғармаси томонидан қопланиши белгиланган базавий нархлар доирасида.

Туман ёки шаҳар тиббиёт бирлашмаси ёхуд унинг бўлими томонидан бериладиган хулосада даволаниш учун талаб этиладиган маблағ миқдори аниқ кўрсатилиши керак.

Қайси ҳолатларда ёрдам ажратилади?

Мазкур ижтимоий ёрдам:

• тиббий ёрдам харажатлари қонунчиликка мувофиқ Давлат тиббий суғуртаси маблағлари ҳисобидан тўлиқ қопланмаган бўлса;
• даволаниш харажатлари «Аёллар дафтари» жамғармаси, «Саховат ва кўмак» жамғармаси ёки бошқа манбалар ҳисобидан қопланмаган бўлса

ажратилади.

Бир хил даволаниш харажатини бир вақтнинг ўзида бир нечта манба ҳисобидан қоплашга йўл қўйилмайди.

Қаерга мурожаат қилинади?

Ариза берувчи уни «Ёшлар дафтари»га киритиш ва даволаниш харажатларини қоплаш бўйича ижтимоий ёрдам ажратишни сўраб:

• исталган Давлат хизматлари марказига;
• Ягона интерактив давлат хизматлари портали орқали;
• Ёшлар ягона электрон платформаси орқали

мурожаат қилиши мумкин.

16 ёшга тўлмаган ёшлар номидан уларнинг ота-онаси ёки ота-онасининг ўрнини босувчи шахс мурожаат қилади.

Даволаниш харажатларини қоплаш бўйича ёрдам олувчилардан ижтимоий шартнома тузиш талаб этилмайди.

Аризага қандай ҳужжат илова қилинади?

Аризага туман ёки шаҳар тиббиёт бирлашмаси ёхуд унинг бўлими томонидан берилган тиббий хулоса илова қилинади.

Хулосада:

• беморнинг даволанишга эҳтиёжи;
• жарроҳлик амалиётисиз даволаниш ёки жарроҳлик амалиёти зарурлиги;
• даволаниш учун талаб этиладиган маблағ миқдори

аниқ кўрсатилиши лозим.

Ариза берувчининг оиласи Ижтимоий реестрга киритилганлиги ёки оила даромади белгиланган мезонга мувофиқлиги тегишли ахборот тизимлари орқали автоматик равишда аниқланади.

Мурожаат қандай кўриб чиқилади?

Ёшлар етакчиси мурожаатни ўрганиб, коллегиал қарор қабул қилиш учун 3 иш куни ичида «маҳалла еттилиги»га киритади.

«Маҳалла еттилиги» мурожаат ва унга илова қилинган ҳужжатларни ўрганиб:

• ариза берувчини «Ёшлар дафтари»га киритиш ва ижтимоий ёрдам ажратиш;
• ёки мурожаатни қаноатлантиришни рад этиш

тўғрисида 5 иш куни ичида қарор қабул қилади.

Қабул қилинган қарор ҳақида ариза берувчига электрон шаклда ёки СМС-хабар орқали маълум қилинади.

Даволаниш қандай ташкил этилади?

Ижтимоий ёрдам ажратиш ҳақида ижобий қарор қабул қилинганда, ариза берувчи Соғлиқни сақлаш вазирлигининг DMED ахборот тизими орқали:

• Давлат тиббий суғуртаси жамғармаси билан шартнома тузган ҳудудий ва республика даражасидаги давлат тиббиёт ташкилотларига;
• Давлат тиббий суғуртаси жамғармаси билан тегишли шартномаси мавжуд нодавлат тиббиёт ташкилотларига

даволаниш учун йўналтирилади.

Ариза берувчилар DMED ахборот тизимида бошқа беморлардан алоҳида юритиладиган навбат асосида даволанади.

Тиббиёт ташкилоти беморни йўлланма ва алоҳида навбат асосида қабул қилиб, жарроҳлик амалиётисиз даволашни ёки жарроҳлик амалиётини ўтказишни таъминлайди.

Харажатлар қандай тўланади?

Бемор даволанганидан кейин тиббиёт ташкилоти кўрсатилган тиббий хизматларни асословчи ҳужжатларни Давлат тиббий суғуртаси жамғармасига тақдим этади.

Давлат тиббий суғуртаси жамғармаси тегишли харажатларни қоплаш учун электрон талабнома киритади.

Талабномадаги маблағ миқдори туман ёки шаҳар тиббиёт бирлашмаси ёхуд унинг бўлими томонидан берилган хулосада кўрсатилган миқдордан ошмаслиги керак.

Туман ёки шаҳар ҳокимлиги талабнома келиб тушганидан кейин 3 иш куни ичида «Ёшлар дафтари» жамғармаси маблағларини Давлат тиббий суғуртаси жамғармасининг тегишли ҳисобварағига ўтказади.

Давлат тиббий суғуртаси жамғармаси маблағларни тиббий хизмат кўрсатган ташкилотга ўтказиб беради. Маблағлар ариза берувчининг ўзига нақд пул шаклида берилмайди.