14 yoshga to‘lgan va 30 yoshdan oshmagan, ya’ni 31 yoshga to‘lmagan yoshlarga «Yoshlar daftari» jamg‘armasi mablag‘lari hisobidan jarrohlik amaliyotisiz davolanish va jarrohlik amaliyoti xarajatlarini qoplash uchun ijtimoiy yordam ajratilishi mumkin.

Mazkur yordam:

• Ijtimoiy reestrga kiritilgan oilalar a’zolariga;
• oila a’zolarining har biriga to‘g‘ri keladigan oylik daromadi minimal iste’mol xarajatlari miqdorining 2 baravaridan oshmaydigan oilalar a’zolariga

beriladi.

Ushbu yordam turi ayni bir ariza beruvchiga bir yilda bir marta ajratiladi.

Qancha miqdorda mablag‘ ajratiladi?

Davolanish turiga qarab quyidagi miqdorda mablag‘ ajratiladi:

• jarrohlik amaliyotisiz davolanish uchun — bazaviy hisoblash miqdorining 50 baravarigacha;
• jarrohlik amaliyotini o‘tkazish uchun — Davlat tibbiy sug‘urtasi jamg‘armasi tomonidan qoplanishi belgilangan bazaviy narxlar doirasida.

Tuman yoki shahar tibbiyot birlashmasi yoxud uning bo‘limi tomonidan beriladigan xulosada davolanish uchun talab etiladigan mablag‘ miqdori aniq ko‘rsatilishi kerak.

Qaysi holatlarda yordam ajratiladi?

Mazkur ijtimoiy yordam:

• tibbiy yordam xarajatlari qonunchilikka muvofiq Davlat tibbiy sug‘urtasi mablag‘lari hisobidan to‘liq qoplanmagan bo‘lsa;
• davolanish xarajatlari «Ayollar daftari» jamg‘armasi, «Saxovat va ko‘mak» jamg‘armasi yoki boshqa manbalar hisobidan qoplanmagan bo‘lsa

ajratiladi.

Bir xil davolanish xarajatini bir vaqtning o‘zida bir nechta manba hisobidan qoplashga yo‘l qo‘yilmaydi.

Qaerga murojaat qilinadi?

Ariza beruvchi uni «Yoshlar daftari»ga kiritish va davolanish xarajatlarini qoplash bo‘yicha ijtimoiy yordam ajratishni so‘rab:

• istalgan Davlat xizmatlari markaziga;
• Yagona interaktiv davlat xizmatlari portali orqali;
• Yoshlar yagona elektron platformasi orqali

murojaat qilishi mumkin.

16 yoshga to‘lmagan yoshlar nomidan ularning ota-onasi yoki ota-onasining o‘rnini bosuvchi shaxs murojaat qiladi.

Davolanish xarajatlarini qoplash bo‘yicha yordam oluvchilardan ijtimoiy shartnoma tuzish talab etilmaydi.

Arizaga qanday hujjat ilova qilinadi?

Arizaga tuman yoki shahar tibbiyot birlashmasi yoxud uning bo‘limi tomonidan berilgan tibbiy xulosa ilova qilinadi.

Xulosada:

• bemorning davolanishga ehtiyoji;
• jarrohlik amaliyotisiz davolanish yoki jarrohlik amaliyoti zarurligi;
• davolanish uchun talab etiladigan mablag‘ miqdori

aniq ko‘rsatilishi lozim.

Ariza beruvchining oilasi Ijtimoiy reestrga kiritilganligi yoki oila daromadi belgilangan mezonga muvofiqligi tegishli axborot tizimlari orqali avtomatik ravishda aniqlanadi.

Murojaat qanday ko‘rib chiqiladi?

Yoshlar etakchisi murojaatni o‘rganib, kollegial qaror qabul qilish uchun 3 ish kuni ichida «mahalla ettiligi»ga kiritadi.

«Mahalla ettiligi» murojaat va unga ilova qilingan hujjatlarni o‘rganib:

• ariza beruvchini «Yoshlar daftari»ga kiritish va ijtimoiy yordam ajratish;
• yoki murojaatni qanoatlantirishni rad etish

to‘g‘risida 5 ish kuni ichida qaror qabul qiladi.

Qabul qilingan qaror haqida ariza beruvchiga elektron shaklda yoki SMS-xabar orqali ma’lum qilinadi.

Davolanish qanday tashkil etiladi?

Ijtimoiy yordam ajratish haqida ijobiy qaror qabul qilinganda, ariza beruvchi Sog‘liqni saqlash vazirligining DMED axborot tizimi orqali:

• Davlat tibbiy sug‘urtasi jamg‘armasi bilan shartnoma tuzgan hududiy va respublika darajasidagi davlat tibbiyot tashkilotlariga;
• Davlat tibbiy sug‘urtasi jamg‘armasi bilan tegishli shartnomasi mavjud nodavlat tibbiyot tashkilotlariga

davolanish uchun yo‘naltiriladi.

Ariza beruvchilar DMED axborot tizimida boshqa bemorlardan alohida yuritiladigan navbat asosida davolanadi.

Tibbiyot tashkiloti bemorni yo‘llanma va alohida navbat asosida qabul qilib, jarrohlik amaliyotisiz davolashni yoki jarrohlik amaliyotini o‘tkazishni ta’minlaydi.

Xarajatlar qanday to‘lanadi?

Bemor davolanganidan keyin tibbiyot tashkiloti ko‘rsatilgan tibbiy xizmatlarni asoslovchi hujjatlarni Davlat tibbiy sug‘urtasi jamg‘armasiga taqdim etadi.

Davlat tibbiy sug‘urtasi jamg‘armasi tegishli xarajatlarni qoplash uchun elektron talabnoma kiritadi.

Talabnomadagi mablag‘ miqdori tuman yoki shahar tibbiyot birlashmasi yoxud uning bo‘limi tomonidan berilgan xulosada ko‘rsatilgan miqdordan oshmasligi kerak.

Tuman yoki shahar hokimligi talabnoma kelib tushganidan keyin 3 ish kuni ichida «Yoshlar daftari» jamg‘armasi mablag‘larini Davlat tibbiy sug‘urtasi jamg‘armasining tegishli hisobvarag‘iga o‘tkazadi.

Davlat tibbiy sug‘urtasi jamg‘armasi mablag‘larni tibbiy xizmat ko‘rsatgan tashkilotga o‘tkazib beradi. Mablag‘lar ariza beruvchining o‘ziga naqd pul shaklida berilmaydi.