Ногиронлиги бўлган шахсларга ипотека субсидияси ажратишдаги имтиёз

Даромади юқори бўлмаган ва уй-жой шароитларини яхшилашга муҳтож фуқароларга уй-жой сотиб олиш учун ипотека кредити бўйича:

бошланғич бадалнинг бир қисмини;
ипотека кредити бўйича фоиз тўловларининг бир қисмини

Ўзбекистон Республикаси Давлат бюджети маблағлари ҳисобидан қоплаш учун субсидия ажратилиши мумкин.

Якка тартибдаги уй-жойни қуриш ёки реконструкция қилиш учун ажратилган ипотека кредитлари бўйича ҳам фоиз тўловларининг бир қисми субсидия ҳисобидан қопланиши мумкин.

Ногиронлик ҳолати учун бериладиган балл

Ариза берувчи ёки унинг оила аъзоларидан бири «Ягона миллий ижтимоий ҳимоя» ахборот тизимининг «Тиббий-ижтимоий экспертиза» модулида рўйхатдан ўтган бўлса, ижтимоий мезонлар бўйича 5 балл берилади.

Бунда ногиронлик ҳолатини тасдиқлаш учун туман тиббиёт бирлашмасининг алоҳида хулосасини тақдим этиш талаб қилинмайди.

Маълумотлар Ижтимоий ҳимоя миллий агентлигининг ахборот тизими орқали автоматик равишда текширилади.

Субсидия олиш учун қанча балл талаб этилади?

Ариза берувчи ижтимоий мезонлар асосида баҳоланади.

Ипотека кредити бўйича субсидия олиш ҳуқуқига эга талабгор деб топилиш учун ариза берувчи 30 ва ундан юқори балл тўплаши керак.

Ногиронлик ҳолати учун бериладиган 5 баллнинг ўзи субсидия олиш учун етарли эмас. Ариза берувчи даромади, уй-жойи мавжуд ёки мавжуд эмаслиги ва бошқа ижтимоий мезонлар бўйича ҳам баҳоланади.

Баҳолашда эътиборга олинадиган асосий мезонлар

Ариза берувчига қуйидаги мезонлар асосида балл берилади:

ариза берувчи, унинг турмуш ўртоғи ва аризада кўрсатилган яқин қариндошларининг ўртача ойлик даромади;
ариза берувчи ва унинг турмуш ўртоғи номида республика ҳудудида мулк ҳуқуқи асосида турар жой мавжуд эмаслиги;
ариза берувчининг қонунчиликда белгиланган ижтимоий ҳимояга муҳтож тоифалардан бирига мансублиги;
ариза берувчи ёки унинг оила аъзосига ногиронлик белгиланганлиги;
ариза берувчининг кредит тарихи тижорат банкининг ички талабларига мувофиқлиги.

Ариза берувчи ёки унинг турмуш ўртоғи номида республика ҳудудида тўлиқ мулк ҳуқуқи асосида уй-жой мавжуд бўлса, субсидия ажратилмайди.

Ариза бериш тартиби

Ипотека субсидияси олиш учун:

Давлат хизматлари маркази орқали;
Ягона интерактив давлат хизматлари портали орқали

ариза бериш мумкин.

Ариза ва тегишли маълумотлар масъул давлат органларининг ахборот тизимлари орқали автоматик текширилади. Давлат хизматини кўрсатиш ҳамда маълумотларни олиш учун тўлов ундирилмайди.

Субсидия ажратиш рад этилиши мумкин бўлган ҳолатлар

Қуйидаги ҳолларда субсидия ажратиш рад этилиши мумкин:

аризадаги маълумотлар ижтимоий мезонларга мувофиқ бўлмаса;
нотўғри ёки сохта маълумотлар тақдим этилса;
ариза берувчи 30 баллдан кам тўпласа;
ариза берувчи ёки унинг турмуш ўртоғи илгари ипотека субсидиясидан фойдаланган бўлса;
жорий йил учун ажратилган субсидиялар сони тугаган бўлса;
ариза берувчининг кредит тарихи иштирок этувчи тижорат банкларидан камида биттасининг ички талабларига мувофиқ бўлмаса.

Норматив ҳужжатлар

Ўзбекистон Республикаси Вазирлар Маҳкамасининг 2020 йил 25 мартдаги 182-сон қарори