Nogironligi bo‘lgan shaxslarga ipoteka subsidiyasi ajratishdagi imtiyoz

Daromadi yuqori bo‘lmagan va uy-joy sharoitlarini yaxshilashga muhtoj fuqarolarga uy-joy sotib olish uchun ipoteka krediti bo‘yicha:

boshlang‘ich badalning bir qismini;
ipoteka krediti bo‘yicha foiz to‘lovlarining bir qismini

O‘zbekiston Respublikasi Davlat byudjeti mablag‘lari hisobidan qoplash uchun subsidiya ajratilishi mumkin.

Yakka tartibdagi uy-joyni qurish yoki rekonstruktsiya qilish uchun ajratilgan ipoteka kreditlari bo‘yicha ham foiz to‘lovlarining bir qismi subsidiya hisobidan qoplanishi mumkin.

Nogironlik holati uchun beriladigan ball

Ariza beruvchi yoki uning oila a’zolaridan biri «Yagona milliy ijtimoiy himoya» axborot tizimining «Tibbiy-ijtimoiy ekspertiza» modulida ro‘yxatdan o‘tgan bo‘lsa, ijtimoiy mezonlar bo‘yicha 5 ball beriladi.

Bunda nogironlik holatini tasdiqlash uchun tuman tibbiyot birlashmasining alohida xulosasini taqdim etish talab qilinmaydi.

Ma’lumotlar Ijtimoiy himoya milliy agentligining axborot tizimi orqali avtomatik ravishda tekshiriladi.

Subsidiya olish uchun qancha ball talab etiladi?

Ariza beruvchi ijtimoiy mezonlar asosida baholanadi.

Ipoteka krediti bo‘yicha subsidiya olish huquqiga ega talabgor deb topilish uchun ariza beruvchi 30 va undan yuqori ball to‘plashi kerak.

Nogironlik holati uchun beriladigan 5 ballning o‘zi subsidiya olish uchun etarli emas. Ariza beruvchi daromadi, uy-joyi mavjud yoki mavjud emasligi va boshqa ijtimoiy mezonlar bo‘yicha ham baholanadi.

Baholashda e’tiborga olinadigan asosiy mezonlar

Ariza beruvchiga quyidagi mezonlar asosida ball beriladi:

ariza beruvchi, uning turmush o‘rtog‘i va arizada ko‘rsatilgan yaqin qarindoshlarining o‘rtacha oylik daromadi;
ariza beruvchi va uning turmush o‘rtog‘i nomida respublika hududida mulk huquqi asosida turar joy mavjud emasligi;
ariza beruvchining qonunchilikda belgilangan ijtimoiy himoyaga muhtoj toifalardan biriga mansubligi;
ariza beruvchi yoki uning oila a’zosiga nogironlik belgilanganligi;
ariza beruvchining kredit tarixi tijorat bankining ichki talablariga muvofiqligi.

Ariza beruvchi yoki uning turmush o‘rtog‘i nomida respublika hududida to‘liq mulk huquqi asosida uy-joy mavjud bo‘lsa, subsidiya ajratilmaydi.

Ariza berish tartibi

Ipoteka subsidiyasi olish uchun:

Davlat xizmatlari markazi orqali;
Yagona interaktiv davlat xizmatlari portali orqali

ariza berish mumkin.

Ariza va tegishli ma’lumotlar mas’ul davlat organlarining axborot tizimlari orqali avtomatik tekshiriladi. Davlat xizmatini ko‘rsatish hamda ma’lumotlarni olish uchun to‘lov undirilmaydi.

Subsidiya ajratish rad etilishi mumkin bo‘lgan holatlar

Quyidagi hollarda subsidiya ajratish rad etilishi mumkin:

arizadagi ma’lumotlar ijtimoiy mezonlarga muvofiq bo‘lmasa;
noto‘g‘ri yoki soxta ma’lumotlar taqdim etilsa;
ariza beruvchi 30 balldan kam to‘plasa;
ariza beruvchi yoki uning turmush o‘rtog‘i ilgari ipoteka subsidiyasidan foydalangan bo‘lsa;
joriy yil uchun ajratilgan subsidiyalar soni tugagan bo‘lsa;
ariza beruvchining kredit tarixi ishtirok etuvchi tijorat banklaridan kamida bittasining ichki talablariga muvofiq bo‘lmasa.

Normativ hujjatlar

O‘zbekiston Respublikasi Vazirlar Mahkamasining 2020-yil 25-martdagi 182-son qarori