Пенсияни ишончнома орқали олиш мумкинми?

Пенсия қонунчиликка мувофиқ расмийлаштирилган ишончнома асосида ишончли вакилга тўланиши мумкин.

Ишончнома — бир шахснинг бошқа шахсга унинг номидан муайян ҳаракатларни амалга ошириш учун берган ёзма ваколати.

Ишончли вакил — ишончнома асосида пенсионер номидан пенсия олиш ваколати берилган шахс.

Чет элда расмийлаштирилган ишончномага қандай талаб қўйилади?

Ўзбекистондан ташқарида расмийлаштирилган ишончномага, қоида тариқасида, уни расмийлаштирган давлатнинг ваколатли органи томонидан апостиль қўйилиши керак.

Фуқаролик, оилавий ва жиноий ишлар бўйича ҳуқуқий ёрдам ва ҳуқуқий муносабатлар тўғрисидаги Минск конвенцияси иштирокчиси бўлган МДҲ давлатларида расмийлаштирилган ҳужжатларга апостиль қўйиш талаб этилмайди.

Апостиль — хорижий давлатда расмийлаштирилган расмий ҳужжатнинг ҳақиқийлигини тасдиқловчи махсус белги.

Зарур ҳолларда хорижий тилдаги ишончнома қонунчиликда белгиланган тартибда таржима қилиниши керак.

Ишончли вакил қандай ҳаракат қилади?

Ишончли вакил:

ишончноманинг асл нусхасини пенсияни етказиб берувчи ташкилот ёки тижорат банки филиалига тақдим этади;
шахсини тасдиқловчи ҳужжатни кўрсатади;
пенсия тўловига таъсир кўрсатиши мумкин бўлган ўзига маълум ҳолатлар ҳақида Пенсия жамғармаси бўлимига хабар беради.

Ишончнома пенсияни етказиб берувчи ташкилот бўлинмасида сақланади. Унинг тасдиқланган нусхаси ишончнома тақдим этилган кундан бошлаб 10 кун ичида Пенсия жамғармасининг тегишли бўлимига юборилади.

Пенсионер пенсия ҳуқуқини қандай тасдиқлайди?

Ишончнома берган пенсионер Пенсия жамғармаси бўлимларидан бирига бир йилда камида бир марта шахсан келиб, тайинланган пенсияга бўлган ҳуқуқини тасдиқлаши керак.

Пенсионер чет элда бўлиб, Ўзбекистонга келиш имкониятига эга бўлмаса, Ўзбекистоннинг хориждаги дипломатик ваколатхонаси ёки консуллик муассасасига мурожаат қилиши мумкин.

Бунда пенсионер:

хорижий давлатда доимий яшамаётганини;
ушбу давлатдан пенсия ёки ижтимоий нафақа олмаётганини тасдиқлаши лозим.

Белгиланган муддатда пенсия ҳуқуқи тасдиқланмаса, пенсия тўлови вақтинча тўхтатиб турилиши мумкин.

Кимлар ишончли вакил бўла олмайди?

Пенсия олувчиларга хизмат кўрсатувчи:

Пенсия жамғармаси бўлими ходими;
пенсияни етказиб берувчи ташкилот ходими;
тижорат банки филиали ходими ишончнома асосида пенсионернинг пенсиясини олиши қатъиян тақиқланади.

Норматив ҳужжатлар

Вазирлар Маҳкамасининг 2022 йил 13 октябрдаги 592-сон қарори

Фуқаролик, оилавий ва жиноий ишлар бўйича ҳуқуқий ёрдам ва ҳуқуқий муносабатлар тўғрисидаги Конвенция