Талабалар ўқишини кўчириш ва қайта тиклаш тартиби

Ариза бериш муддатлари

Давлат олий таълим ташкилотлари ўртасида ўқишни кўчириш ёки кўчириб тиклаш учун аризалар:

кузги семестр олдидан — 15 июлдан 5 августгача;
баҳорги семестр олдидан — 10 январдан 20 январгача

электрон платформа орқали қабул қилинади.

Баҳорги семестр олдидан талабанинг ўқишини бир олий таълим ташкилотидан бошқасига кўчириб тиклаш ҳақидаги аризалар қабул қилинмайди.

Ўқишни қайта тиклаш бўйича аризалар ҳам кузги ва баҳорги семестр олдидан белгиланган мазкур муддатларда муайян олий таълим ташкилоти томонидан қабул қилинади.

Бир давлат олий таълим ташкилотидан бошқасига кўчириш

Талабанинг ўқишини бошқа давлат олий таълим ташкилотига кўчиришга асосан қуйидаги ҳолатларда рухсат берилади:

талаба турмуш қургани муносабати билан турмуш ўртоғи доимий яшайдиган ҳудуддаги олий таълим ташкилотига кўчишни сўраганда;
давлат органи ходимининг иш жойи ўзгарганда, унинг турмуш ўртоғи ёки вояга етмаган фарзанди тегишли раҳбар тавсияси асосида мурожаат қилганда.

Ўқиш, қоида тариқасида, мос ёки турдош таълим йўналишига кўчирилади.

Муҳим: талабанинг хоҳиши ёки яшаш манзили ўзгарганининг ўзи бошқа давлат олий таълим ташкилотига ўқишни кўчириш учун етарли асос ҳисобланмайди.

Тақдим этиладиган ҳужжатлар

Электрон платформага:

кўчириш асосини тасдиқловчи ҳужжат;
рейтинг дафтарчаси, академик маълумотнома ёки транскрипт;
сўровномада талаб қилинган бошқа маълумотлар юкланади.

Аризадаги маълумотлар ҳужжатларнинг аслига мос бўлиши керак.

Бир олий таълим ташкилоти доирасида кўчириш

Бир олий таълим ташкилоти доирасида мос ёки турдош таълим йўналишига ҳамда мос магистратура мутахассислигига кўчириш ва қайта тиклаш шу ташкилот ректори ёки директорининг буйруғи асосида амалга оширилади.

Турдош бўлмаган йўналишга кўчириш алоҳида ваколатли орган ёки Давлат комиссияси қарори асосида кўриб чиқилади.

Хорижий ёки нодавлат ташкилотдан кўчириш

Хорижий ва нодавлат олий таълим ташкилотларидан давлат олий таълим ташкилотларига кўчириш учун ариза ҳар йили 15 июлдан 5 августгача:

ЯИДХП;
махсус электрон платформа;
Давлат хизматлари маркази орқали берилади.

Талабгор давлат олий таълим ташкилотининг мос ёки турдош бакалавриат йўналиши бўйича ўқийдиган тилида махсус синов — тест ёки касбий (ижодий) имтиҳон топширади.

Хорижий ва нодавлат олий таълим ташкилотларининг магистратура босқичидан давлат олий таълим ташкилотига ўқишни кўчиришга рухсат берилмайди.