Вояга етмаган набирани хорижга олиб чиқиш тартиби

10 ёшли набирани хорижга саёҳатга олиб чиқиш мумкинми?

Ҳа. Бобо ёки буви вояга етмаган набирасини хорижга олиб чиқиши мумкин. Бунинг учун боланинг хорижга чиқиш биометрик паспорти ва қонунчиликда белгиланган розилик ҳужжатлари мавжуд бўлиши керак.

Ота-оналарнинг нотариал розилиги керакми?

Вояга етмаган боланинг хорижга чиқиши учун ота-оналар ёки бошқа қонуний вакилларнинг розилиги талаб қилинади.

Агар бобо ёки буви болани саёҳатга олиб чиқаётган бўлса, розиликда:

боланинг маълумотлари;
ҳамроҳлик қилувчи шахснинг маълумотлари;
сафар қилинадиган давлат;
сафар муддати;
хорижга чиқиш мақсади аниқ кўрсатилиши мақсадга мувофиқ.

Бобо ёки буви ҳам алоҳида мажбурият расмийлаштирадими?

Ҳа. Бола билан унинг ота-онаси, васийси ёки ҳомийси эмас, балки бобо, буви ёхуд бошқа шахс сафар қилса, ҳамроҳлик қилувчи шахснинг нотариал тасдиқланган мажбурияти талаб қилинади.

Унда ҳамроҳлик қилувчи шахс боланинг хавфсизлиги, назорати ва белгиланган муддатда Ўзбекистонга қайтиши учун масъулиятни зиммасига олади.

Муҳим: ота-оналарнинг розилиги ва ҳамроҳлик қилувчи шахснинг мажбурияти — мазмунан бир-биридан фарқ қиладиган алоҳида ҳужжатлардир.

Қандай ҳолларда ота-оналардан бирининг розилиги талаб қилинмайди?

Қонунчиликда назарда тутилган ҳолатларда, жумладан:

ота-оналардан бири вафот этган бўлса;
бола ёлғиз она томонидан тарбияланаётгани расмий тасдиқланган бўлса;
ота-оналардан бири ота-оналик ҳуқуқидан маҳрум қилинган бўлса;
ота-оналардан бири бедарак йўқолган ёки муомалага лаёқатсиз деб топилган бўлса, унинг розилиги тегишли тасдиқловчи ҳужжат асосида талаб қилинмаслиги мумкин.

Қўшимча талабларни ҳам текшириш керакми?

Ҳа. Сафардан олдин бориладиган давлатнинг:

виза;
болаларнинг кириши;
суғурта;
розилик ҳужжатининг таржимаси;
апостиль ёки легаллаштириш бўйича талабларини алоҳида текшириш лозим.

Тартиб Ўзбекистон Республикаси фуқаросининг хорижга чиқиш биометрик паспортини расмийлаштириш ва бериш тизимини такомиллаштириш тўғрисидаги ПҚ–4079-сон қарор ва «Нотариат тўғрисида»ги Қонун билан белгиланади.