Уй-жойни бўлиб-бўлиб тўлаш шарти билан сотиб олиш

Уй-жой (квартира)ни бошқа шахсга ўтказиш (олди-сотди, айирбошлаш, ҳадя) шартномаси

Уй-жойни бўлиб-бўлиб тўлаш шарти билан сотиб олиш мумкинми?

Ҳа. Сотувчи рози бўлса, уй-жой учун тўловнинг бир қисмини шартнома тузилганда, қолган қисмини эса белгиланган муддат давомида тўлаш шарти билан олди-сотди шартномаси тузиш мумкин.

Бундай шартнома нотариал тартибда тасдиқланиши ва мулк ҳуқуқи давлат рўйхатидан ўтказилиши лозим.

Шартномада нималар кўрсатилиши керак?

Шартномада қуйидагилар аниқ белгиланиши зарур:

уй-жойнинг умумий нархи;
дастлабки тўлов миқдори;
қолган қарз суммаси;
ҳар бир тўловнинг миқдори ва санаси;
тўлов усули;
кечиктирилган тўлов учун жавобгарлик;
тўлов бажарилмаса шартномани бекор қилиш ёки қарзни ундириш тартиби.

Уй-жой харидор номига ўтадими?

Нотариал шартнома ва давлат рўйхатидан ўтказиш асосида мулк ҳуқуқи харидор номига расмийлаштирилиши мумкин.

Бироқ тўлов ва бошқа мажбуриятлар тўлиқ бажарилгунига қадар уй-жойни бошқа шахсга ўтказишга тақиқ қўйилади.

Муҳим: тақиқ мулк ҳуқуқини бекор қилмайди, аммо харидорга уй-жойни сотиш, ҳадя қилиш, айирбошлаш ёки гаровга қўйиш имконини бермайди.

Харидор тўловни амалга оширмаса нима бўлади?

Ҳуқуқий оқибатлар шартномадаги шартларга боғлиқ. Сотувчи:

муддати ўтган қарзни ундиришни;
неустойка ёки фоиз тўлашни;
шартномани бекор қилишни;
қонунда ва шартномада назарда тутилган бошқа чораларни талаб қилиши мумкин.

Низо келиб чиқса, масала суд тартибида ҳал қилинади.

Тақиқ қандай бекор қилинади?

Қарз тўлиқ тўланганидан кейин банк тўлов ҳужжатлари, сотувчининг аризаси, тилхат ёки бошқа тасдиқловчи ҳужжат асосида нотариусга мурожаат қилинади.

Тўлов тўлиқ амалга оширилгани тасдиқлангач, уй-жойни бошқа шахсга ўтказишга қўйилган тақиқ бекор қилинади.

Тартиб Ўзбекистон Республикасининг Фуқаролик кодекси, «Нотариат тўғрисида»ги Қонун ва Нотариуслар томонидан нотариал ҳаракатларни амалга ошириш тартиби тўғрисидаги йўриқнома билан белгиланади.

Мақола фойдали бўлдими?

Бўлимлар