Автотураргоҳлар аллақачон 11 та марказий кўчада мавжуд. Илова Тошкент Инвест компаниясининг шўба корхонаси томонидан ишлаб чиқилган.

Тошкентда пулли йўл бўйи тўхташ жойлари учун тўловларни амалга ошириш имконини берувчи Пойтахт Паркинг мобил иловаси ишга туширилди.

Илова «Бизнес» тоифасида 8-ўринни эгаллаган AppStore ва 5 мингдан ортиқ юклаб олинган Google Play иловалар дўконларида мавжуд.

8 май куни Амир Темур хиёбони, Миробод, Шаҳрисабз, Истиқбол ва Зарафшон каби 6 та синов кўчасида йўл бўйи пулли автотураргоҳлар лойиҳаси расман ишга туширилди. Иккинчи босқичда 30 июнгача пойтахтнинг яна 30 та кўчасида пулли автотураргоҳлар пайдо бўлиши керак, июль ойи охиригача эса 13 208 та тўхташ жойига мўлжалланган нуқталар 86 та кўчада ишга тушади.

Пулли автотураргоҳлар оператори Streetpark Systems автотураргоҳ учун тўловни амалга оширишнинг асосий усули Пойтахт Паркинг мобил иловаси бўлишини таъкидлаганди.  AppStore ва Google Playда илова ўнлаб шарҳлар асосида 5 баллдан 2,4 балл олди.

Илова Promobility томонидан ишлаб чиқилган. KTYDR маълумотларига кўра, компания 2024 йилнинг октябрь ойида ташкил этилган ва “компьютер дастурлаштириш соҳасидаги фаолият” билан шуғулланади. Промобилитй таъсисчиси — Тошкент Инвест компанияси (аффилланган шахслар реестрига киритилган), директори — Кочергина Екатерина Сергеевна. Устав фонди — 3,01 млрд сўм.

Пойтахт Паркинг иловасида 11 та кўчадаги пулли автотураргоҳ келтирилган. Булар — Братислава, Миробод, Авлиё ота, Тарас Шевченко, Шаҳрисабз, Содиқ Азимов, Истиқбол, Амир Темур хиёбони, Ўзбекистон овози, Маҳатма Ганди ва Ҳамид Олимжон. Автотураргоҳ нархлари тариф зонасига қараб 5 минг сўмдан 12 минг сўмгача ўзгаради.

Ўзбек, рус ва инглиз тилларида мавжуд бўлган иловада тўхташ сессиясининг давомийлигини танлаш мумкин, ундан келиб чиққан ҳолда нарх ҳисобланади. Автотураргоҳ учун тўловни Paynet, Octobank, Click, Payme va Uzum Bank иловалари орқали амалга ошириш мумкин. Шунингдек, автотураргоҳлар ёнида нақд пул қабул қилиш учун Пайнет терминалларини ўрнатиш режалаштирилган эди. Автотураргоҳ нархи тўлов турига қараб фарқ қилмаслиги керак.

Тошкентда пулли автотураргоҳлар

2024 йилнинг октябрида пойтахт ҳокими Шавкат Умурзоқов Тошкентда пулли тўхтаб туриш жойларини ташкил этишга қаратилган қарорни имзолади. Унга кўра, 2025 йилнинг август ойи охиригача 13,2 мингта пулли «парковка» ташкил этиш, келгусида уларни 84 мингтага етказиш режалаштирилганди.

Бундан олдин ҳокимлик пойтахтда пулли тўхтаб туриш жойларини ташкил этиш тартибини тасдиқланганди. Барча туманларда ижарага бериладиган майдонларнинг умумий ҳажми 262,8 минг кв.метрни ташкил этади. Оператор Тошкентнинг барча туманларидаги кўчалардаги нуқталарни уч йил муддатга бошқаришга олади ва уларни техник жиҳозлаш учун камида $5 млн инвестиция киритиши керак бўлади.

Ноябрь ойи охирида ўтказилган биринчи аукционда Балсомуз қўшма корхонаси ғолиб бўлганди. Компания автотураргоҳлар ижараси учун тахминан 120 млрд сўм таклиф қилган, аммо келишув тасдиқланмаган.

Декабрь ойи ўрталарига келиб, Streetpark Systems пойтахт кўчаларида пулли “парковка"ларни ташкил этиш ҳуқуқи учун такрорий савдоларда ғолиб чиқди. Ушбу компания аукционнинг иккинчи босқичида «парковка» майдонларини 3 йилга ижарага олиш учун 62,93 млрд сўм таклиф этди.

Шунингдек, ушбу компания пулли «парковка» платформасини яратиш бўйича тендерда ҳам ғолиб бўлган. Март ойида Streetpark Systems мобил илова яратиш устида иш олиб бораётгани маълум бўлди.

2 май куни Тошкентда йўл бўйидаги биринчи пулли автотураргоҳлар синовдан ўтказилаётгани маълум бўлди. Улардан бири Амир Темур хиёбони атрофида жойлашган бўлиб, бу ерда тўхташ жойининг нархи соатига 12 минг сўмни ташкил этади.

Аввалроқ кредит расмийлаштирилишини онлайн тақиқлаш имкони яратилгани ҳақида хабар берилганди. Хизматдан Кредит-ахборот таҳлилий маркази кредит бюроси сайтидан бепул фойдаланиш мумкин.