Давлат боғчасига имтиёзли навбат

Ўзбекистоннинг бир қатор вилоятларида болалар боғчаси учун тўлов пасайтирилди

Имтиёзли навбат нима?

Имтиёзли навбат — қонунчиликда белгиланган тоифадаги болаларни давлат мактабгача таълим ташкилотига умумий навбат билан алмашиб борадиган устунлик асосида қабул қилиш рўйхати.

Имтиёз боланинг боғчага дарҳол ёки навбатсиз қабул қилинишини англатмайди. Йўлланма боланинг ёшига мос гуруҳда бўш ўрин пайдо бўлганда ва белгиланган кетма-кетлик асосида шаклланади.

Кимлар имтиёзли навбатга қўйилади?

Қуйидаги болалар имтиёзли рўйхатга киритилади:

I ёки II гуруҳ ногиронлиги бўлган шахсларнинг болалари;
кўп болали оилаларнинг болалари;
етим ёки ота-она қарамоғидан маҳрум бўлган болалар;
тазйиқ ва зўравонликдан жабр кўрган шахсларнинг болалари;
Ижтимоий реестрга киритилган оилаларнинг болалари;
«Аёллар дафтари»га киритилган ижтимоий ҳимояга муҳтож ёлғиз аёлларнинг болалари;
контракт бўйича ҳарбий хизматчилар, ички ишлар ва божхона органлари ходимларининг болалари;
талабалар ва педагогларнинг болалари;
акаси ёки опаси танланган ташкилотга қатнаётган болалар;
ихтисослаштирилган мактабгача ташкилотдан умумий турдаги ташкилотга ўтказилаётган соғайган болалар.

Ариза қандай берилади?

Имтиёз турига қараб:

маълумотлар давлат ахборот тизимларидан автоматик текширилади;
айрим тоифалар бўйича Давлат хизматлари марказига шахсан мурожаат қилиб, имтиёзни тасдиқловчи ҳужжат кўрсатилади.

Тазйиқ ва зўравонликдан жабр кўрган шахслар ҳамда Ижтимоий реестрдаги оилалар болалари «Инсон» маркази ижтимоий ходимлари талабномаси орқали ҳам имтиёзли навбатга қўйилиши мумкин.

Имтиёзли ва умумий навбат қандай ҳаракатланади?

Бўш ўринлар қуйидаги тартибда навбатма-навбат тақсимланади:

имтиёзли рўйхатдан битта бола;
умумий рўйхатдан битта бола.

Агар болалар эгизак бўлса, уларнинг аризалари бир вақтда расмийлаштирилади. Зарур ҳолда гуруҳ қуввати иккинчи эгизак учун вақтинча оширилиши мумкин.

Янги қурилган боғчада алоҳида тартиб борми?

Биринчи марта болалар қабул қилаётган янги қурилган давлат боғчасига аввало вазирлик тасдиқлаган микроучасткада яшовчи болалар устунлик билан қабул қилинади.

Микроучасткадаги болалар қабул қилингандан кейин қолган ўринлар умумий ва имтиёзли навбат асосида тақсимланади.

Имтиёз қаерларда қўлланилмайди?

Мазкур имтиёзли навбат давлат-хусусий шериклик асосидаги нодавлат мактабгача таълим ташкилотларига умумий тартибда татбиқ этилмайди. Уларда ижтимоий кўмакка муҳтож оилалар ва махсус контингент учун алоҳида квота тартиби мавжуд.

Бола 7 ёшга тўлса навбат сақланадими?

Жорий ўқув йилининг 31 майига қадар 7 ёшга тўладиган боланинг аризаси шу санада автоматик бекор қилинади ва у навбатдан чиқарилади.