Парваришлаш ҳолатини тасдиқловчи далолатномани расмийлаштириш

Далолатнома нима учун керак?

Парваришлашнинг ҳақиқий ҳолатини текшириш далолатномаси — шахснинг парваришга муҳтож фуқаро билан бирга яшаб, амалда унга қараб турганини тасдиқловчи электрон ҳужжат.

«Ягона миллий ижтимоий ҳимоя» ахборот тизимидаги ушбу маълумот қараб турувчи шахсга пенсия тайинлашда парвариш даврини иш стажига қўшиб ҳисоблаш учун асос бўлади. Бир парваришга муҳтож шахс бўйича бу давр у билан бирга яшаган шахслардан фақат бирига ҳисобланади.

Кимга қараб туриш ҳолати расмийлаштирилади?

Далолатнома қуйидагиларга амалда қараб турган шахс учун расмийлаштирилади:

I гуруҳ ногиронлиги бўлган шахс;
18 ёшгача ногиронлиги бўлган бола;
ўзгалар парваришига муҳтож деб баҳоланган 80 ёшга тўлган кекса.

Ариза берувчи парваришга муҳтож шахс билан бирга яшаши керак. У Ўзбекистон фуқароси ёки Ўзбекистонда яшаш гувоҳномасига эга чет эл фуқароси ёхуд фуқаролиги бўлмаган шахс бўлиши мумкин.

Қаерга мурожаат қилинади?

Ариза берувчи:

Давлат хизматлари марказига;
«Инсон» ижтимоий хизматлар марказига;
ЯИДХП орқали мурожаат қилиши мумкин.

Давлат хизмати бепул кўрсатилади. Сўровномада назарда тутилмаган қўшимча маълумот ёки ҳужжатларни талаб қилишга йўл қўйилмайди. Ногиронлик, ёш ва парваришга муҳтожлик ҳақидаги маълумотлар ахборот тизимлари орқали текширилади.

Текшириш қандай ўтказилади?

«Инсон» марказининг ваколатли ходими сўровнома келиб тушганидан бошлаб 5 иш куни ичида парваришга муҳтож шахс яшайдиган манзилга чиқади.

Текшириш маҳалла фуқаролар йиғини раиси иштирокида ўтказилади. Ҳақиқатда бирга яшаш, парвариш кўрсатилаётгани ва сўровномадаги маълумотларнинг тўғрилиги ўрганилади.

Далолатнома қанча муддат амал қилади?

Далолатнома 12 ойга расмийлаштирилади.

Парваришлашнинг ҳақиқий ҳолати ҳар 6 ойда ваколатли орган ходимлари томонидан жойига чиққан ҳолда мониторинг қилинади. Далолатнома бўлмаса, парваришлаш ҳолати суд қарори билан белгиланиши мумкин.

Қачон далолатнома расмийлаштириш рад этилади?

Қуйидаги ҳолатларда рад этилади:

сўровномада нотўғри ёки хато маълумот берилса;
сўровномадаги маълумотлар тасдиқланмаса;
парваришга муҳтож шахс розилик бермаса;
парваришга муҳтож шахс Ижтимоий қўллаб-қувватлаш маркази ёки «Ғамхўрлик» марказига жойлаштирилган бўлса.

Бошқа сабаблар, жумладан, хизматни кўрсатиш «мақсадга мувофиқ эмас» деган важ билан рад этиш мумкин эмас. Камчиликлар бартараф этилгандан кейин қайта мурожаат қилиш мумкин.

Далолатнома қачон бекор қилинади?

Далолатнома ахборот тизимида автоматик равишда бекор қилинади, агар:

қараб турувчи ёки парваришга муҳтож шахс вафот этса;
парваришга муҳтож шахс Ижтимоий қўллаб-қувватлаш маркази ёки «Ғамхўрлик» марказига жойлаштирилса;
парваришга муҳтож шахс никоҳ тузса.

Рад этиш ёки бекор қилиш қонуний эмас деб ҳисобланган тақдирда, юқори турувчи органга ёки судга шикоят қилиш мумкин.

Норматив ҳужжатлар

Вазирлар Маҳкамасининг 2024 йил 31 майдаги 318-сон қарори.