Пойтахт мактабларида ўқувчиларнинг дарсга қатнашишини автоматик назорат қилувчи “SI Davomat” тизими синовдан ўтказилмоқда. Ҳозирча тизим Сергели туманидаги 26 та мактабда ишламоқда ва уларда 446 та смарт-камера ўрнатилган.

Тошкент шаҳрида мактаб ўқувчиларининг дарсларга қатнашишини рақамли назорат қилишга мўлжалланган “SI Davomat” тизимини жорий этиш ишлари бошланди. Тизим смарт-камералар ва Face ID технологияси орқали ўқувчининг дарсда иштирокини автоматик равишда қайд этади.

Ҳозирда янги тизим Сергели туманидаги 26 та умумтаълим мактабида тажриба тариқасида синовдан ўтказилмоқда. Ушбу мактабларга жами 446 та смарт-камера ўрнатилган.

Агар ўқувчи узрли сабабсиз дарс қолдирса, унинг ота-онасига автоматик равишда SMS-хабарнома юборилади.

Давоматга оид маълумотлар шунингдек мактаб директори, профилактика инспектори, Миллий гвардия ходими ва маҳалла вакилларига автоматик тарзда етказилади.

“SI Davomat” тизими ERP Maktab ҳамда Соғлиқни сақлаш вазирлигининг DMED ахборот тизими билан интеграция қилинган. Бу касаллик сабабли дарсга келмаган ўқувчиларни сабабсиз дарс қолдирганлардан фарқлаш имконини беради.

Мактаблар давомат кўрсаткичларига қараб “яшил”, “сариқ” ва “қизил” тоифаларга ажратилади.

Сергели туманидаги синов натижалари ижобий баҳоланса, тизимни Тошкентнинг бошқа умумтаълим мактабларига ҳам босқичма-босқич жорий этиш режалаштирилган.

❗️ Муҳим: ҳозирча “SI Davomat” пойтахтнинг барча мактабларида жорий этилмаган — тизим Сергели туманида синов босқичида.