Товар, иш ва хизмат ҳақида маълумот бериш

Истеъмолчига қандай маълумот берилиши шарт?

Ишлаб чиқарувчи, ижрочи ёки сотувчи истеъмолчига реализация қилинаётган товар, иш ёки хизмат ҳақида ўз вақтида, зарур, тўғри ва тушунарли маълумот бериши шарт.

Маълумотда, жумладан:

товар, иш ёки хизматнинг номи;
унга нисбатан мажбурий талабларни белгилайдиган норматив ҳужжат номи;
асосий ва ўзига хос истеъмол хусусиятлари;
нархи ва сотиб олиш шартлари;
тегишли товарлар учун ишлаб чиқарилган сана;
кафолат мажбуриятлари;
самарали ва хавфсиз фойдаланиш қоидалари;
хизмат ёки яроқлилик муддати;
ишлаб чиқарувчи, ижрочи ёки сотувчининг тўлиқ номи ва юридик манзили;
талаб этиладиган лицензия ва рухсат ҳужжатларининг QR-коди;
импорт товарларда ишлаб чиқарувчи ва импорт қилувчи ҳақидаги маълумот;
товар келиб чиққан мамлакат;
даъволарни қабул қиладиган, таъмирлаш ва техник хизмат кўрсатадиган ташкилотлар манзили;
сақлаш ва хавфсиз утилизация қилиш тартиби кўрсатилиши лозим.

Маълумот қандай шаклда берилади?

Зарур маълумот товарнинг этикеткаси, тамғаси, техник ҳужжати ёки муайян товар, иш ёхуд хизмат тури учун қабул қилинган бошқа усул орқали истеъмолчига етказилиши мумкин.

Ишлаб чиқарувчи ҳақидаги маълумот товарнинг этикеткаси, тамғаси ёки бошқа усулда, сотувчи ва ижрочи ҳақидаги асосий маълумотлар эса истеъмолчи кўриши мумкин бўлган жойда тақдим этилади.

Концерт ва томоша тадбирларида қандай маълумот берилади?

Концерт-томоша тадбирида фонограммадан фойдаланилса, бу ҳақда истеъмолчига олдиндан ахборот берилиши керак.

Бундан ташқари, концерт-томоша тадбирининг дастурида ижрочилар ва асар муаллифлари тўғрисидаги маълумотлар кўрсатилиши шарт.

Нотўғри ёки етарли бўлмаган маълумот берилса нима бўлади?

Агар нотўғри ёки етарли бўлмаган маълумот туфайли истеъмолчи ўзига керакли хусусиятларга эга бўлмаган товарни сотиб олган бўлса, у шартномани бекор қилиш ва зарарни қоплашни талаб қилиш ҳуқуқига эга.

Агар зарур маълумот товар, иш ёки хизматни сотиб олиш пайтида берилмаган бўлса, ваколатли давлат органи бундай товарни реализация қилишни маълумот тақдим этилгунга қадар тўхтатиб туриш чораларини кўриши мумкин.

Эслатма: сотувчи берган реклама ёки оғзаки ваъда товарнинг ҳақиқий хусусиятларига мос келмаса, истеъмолчи харидни тасдиқловчи ҳужжатлар ва берилган ахборотни сақлаб қўйиши мақсадга мувофиқ.

Норматив ҳужжатлар

Ўзбекистон Республикасининг «Истеъмолчиларнинг ҳуқуқларини ҳимоя қилиш тўғрисида»ги Қонуни, 26.04.1996 йилдаги 221-I-сон