Эгасиз турар жойларни аниқлаш, ҳисобга олиш ва давлат мулкига ўтказиш тартиби

Эгасиз турар жой тушунчаси

Эгаси бўлмаган ёки эгаси номаълум бўлган турар жой эгасиз турар жой ҳисобланади. Эгасизлик белгилари аниқланганда, аввало уй-жойнинг мулкдори ёки унинг ишончли вакилини топиш чоралари кўрилади.

Турар жой 6 ойдан ортиқ бўш турган ва унда қонуний асосда яшайдиган шахслар бўлмаган ҳолда қуйидаги белгилардан бири мавжуд бўлса, ҳисобга қўйилиши мумкин:

коммунал хизматлар ва турар жойни сақлаш харажатларидан қарздорлик мавжудлиги;
турар жойнинг бутлиги ва сақланиши таъминланмай, унинг бузилиши ёки унга учинчи шахсларнинг кириш уринишларига йўл қўйилганлиги.

Ушбу ҳолатлар биргаликда ёки алоҳида мавжуд бўлиши етарли.

Ҳисобга қўйиш тартиби

Эгасиз турар жойлар ҳақидаги маълумотлар маҳалла, бошқарув органлари, коммунал корхоналар, юридик ва жисмоний шахслар томонидан тақдим этилиши мумкин.

Турар жой фонди сақланиши мониторинги бўйича комиссия:

объектни хатловдан ўтказади;
мулкдор ҳақида кадастр, ички ишлар ва бошқа органлардан маълумот сўрайди;
эгасизлик белгилари бўйича далолатнома ва бошқа материалларни расмийлаштиради;
ҳужжатларни тегишли шаҳар ёки туман ҳокимлигига тақдим этади.

Ҳокимлик материаллар келиб тушганидан кейин 10 кун ичида турар жойни эгасиз кўчмас мулк сифатида ҳисобга қўйиш учун рўйхатдан ўтказувчи органга ариза юборади.

Ҳисобга қўйилмайдиган ҳолатлар

Мулкдор:

озодликдан маҳрум этиш жазосини ўтаётган;
ўқиш, даволаниш ёки меҳнат фаолияти сабабли чет элда бўлган;
муддатли ҳарбий хизматни ўтаётган;
тиббиёт муассасасида узоқ вақт даволанаётган бўлса, уй-жойни эгасиз сифатида ҳисобга қўйиш мумкин эмас.

Муҳим: уй-жойнинг 6 ойдан ортиқ бўш туриши уни автоматик равишда давлат мулкига айлантирмайди. Объект камида 3 йил ҳисобда туриши ва уни давлат мулкига ўтказиш ҳақида суд қарори қабул қилиниши шарт.

Мулкдор ёки унинг вакили суд қарори қабул қилингунига қадар қайтиб келса, ҳокимликка ариза бериб, уй-жойни ҳисобдан чиқаришни сўраши мумкин. Ариза комиссия билан биргаликда 3 кун ичида кўриб чиқилади.