Ўзгалар парваришига муҳтож кексалар ва ногиронлиги бўлган шахсларни ижтимоий хизматлар билан таъминлаш

Ўзгалар парваришига муҳтож бўлган ёлғиз кексалар билан боғлиқ ҳолатлардаги асосий муаммо нима?

Кимлар ўзгалар парваришига муҳтож шахс сифатида эътироф этилади?

Доимий ёки мунтазам парвариш, маиший ёрдам ва ижтимоий хизматларга муҳтож бўлган:

ёлғиз кексалар;
ёлғиз яшовчи кексалар;
ёлғиз ногиронлиги бўлган шахслар;
ёлғиз яшовчи ногиронлиги бўлган шахслар баҳолаш натижасида тегишли тоифага киритилиши мумкин. Шахсни тоифага киритиш ва Реестрга қўшиш ҳақидаги қарорни «Инсон» ижтимоий хизматлар маркази қабул қилади.

Ўзгалар парваришига муҳтож шахс — соғлиғи ва кундалик ҳаётдаги имкониятлари сабабли бошқа шахснинг ёрдамига ҳамда ижтимоий хизматларга эҳтиёж сезадиган кекса ёки ногиронлиги бўлган шахс.

Шахс қандай аниқланади?

Бундай шахс:

маҳалладаги ижтимоий ходим, патронаж ҳамшира ёки маҳалла раиси томонидан уйма-уй ўрганиш жараёнида;
шахснинг ўзи ёки қонуний вакилининг мурожаати асосида;
бошқа жисмоний ёки юридик шахснинг ёзма, оғзаки ёки электрон хабари орқали аниқланиши мумкин.

Мурожаат «Ижтимоий ҳимоя» ахборот тизимида рўйхатга олинади ва бир иш кунида уни ўрганувчи ижтимоий ходим белгиланади. Мурожаатни қонуний вакил бўлмаган шахс берса, кўрилган чоралар ҳақида унга беш иш куни ичида хабар қилинади.

Яшаш шароити ким томонидан баҳоланади?

Баҳолашни:

«Инсон» маркази ходими;
оилавий шифокор;
маҳалла раиси иштирокидаги мультидисциплинар гуруҳ ўтказади.

Гуруҳ шахснинг соғлиғи, кундалик фаолияти, ўзгалар парваришига эҳтиёжи, уй-жой шароити, ижтимоий ва ҳуқуқий ҳимояга бўлган эҳтиёжини ўрганади.

Мультидисциплинар гуруҳ — шахснинг тиббий, ижтимоий ва маиший эҳтиёжларини биргаликда баҳолайдиган турли соҳа вакилларидан иборат гуруҳ.

Қандай қарор қабул қилинади?

Мультидисциплинар гуруҳ хулосаси асосида «Инсон» маркази директори:

шахснинг тегишли тоифасини белгилайди;
уни Реестрга киритади;
индивидуал ижтимоий хизматлар ва ёрдамлар режасини тасдиқлайди.

Қарор ва режа электрон тизимда расмийлаштирилади. Шахсга натижа СМС орқали хабар қилинади ёки ҳужжат нусхаси ижтимоий ходим томонидан етказилади.

Қандай хизматлар кўрсатилиши мумкин?

Индивидуал режага шахснинг эҳтиёжига қараб:

профилактик тиббий кўрик ва оилавий шифокор назорати;
даволанишга йўналтириш ва соғломлаштириш;
имтиёзли дори воситалари билан таъминлаш;
уйда ижтимоий-маиший хизмат кўрсатиш;
уй-жойни шахс эҳтиёжига мослаштириш;
ҳужжатларни тиклаш ва юридик ёрдам;
реабилитация, ижтимоийлашув ва бошқа хизматлар киритилиши мумкин.

Индивидуал ижтимоий хизматлар режаси — шахснинг аниқ эҳтиёжларидан келиб чиқиб, унга кўрсатиладиган хизматлар, масъул ташкилотлар ва амалга ошириш чораларини белгилайдиган ҳужжат.

Хизматдан воз кечиш мумкинми?

Шахс индивидуал режадаги барча ёки айрим хизматлардан воз кечиш ҳуқуқига эга. Хизматларнинг натижаси мониторинг қилинади ва эҳтиёж ўзгарса, режа қайта кўриб чиқилиши мумкин.

Қарор, ҳаракат ёки ҳаракатсизликдан норози шахс Ижтимоий ҳимоя миллий агентлигининг юқори турувчи бўлинмасига ёки маъмурий судга шикоят қилиши мумкин.