Банк сири

Лойиҳадан кучга кирган қонунгача 7 кун кифоя. Банк сири қонунида нима ўзгарди?

Қандай маълумотлар банк сири ҳисобланади?

Банк сирига, жумладан:

мижознинг операциялари;
банк ҳисобварақлари ва омонатлари;
банк хизмат кўрсатиш жараёнида мижоз ҳақида олган маълумотлар;
банк сейфи ёки банк биносида сақланаётган мол-мулк, унинг хусусияти ва қиймати;
мижоз топшириғи ёки унинг манфаати учун амалга оширилган банклараро операциялар;
бошқа банк мижози ҳақида банклараро ахборот алмашинуви натижасида маълум бўлган ахборот киради.

Банк бу маълумотларни қандай муҳофаза қилиши керак?

Банк ва унинг ходимлари банк сирини қонунчиликда назарда тутилмаган тарзда ошкор қилиши ёки шахсий мақсадда ва бошқа шахслар манфаати учун фойдаланиши мумкин эмас. Банк банк сирини сақлаш учун зарур ташкилий ва техник, шу жумладан ахборот ва киберхавфсизлик чораларини кўриши шарт.

Мижоз ўз маълумотини олиши мумкинми?

Ҳа. Банк сирини ташкил этувчи маълумотлар мижознинг ўзига, унинг ваколат берилган вакилига, шунингдек қонунда белгиланган ҳолларда бошқа шахс ва давлат органларига тақдим этилади.

Демак, «банк сири» дегани мижознинг ўзи ҳам ўз ҳисобварағи ҳақида ахборот ола олмайди дегани эмас.

Давлат органларига банк сири берилиши мумкинми?

Ҳа, лекин фақат қонунда белгиланган асос, доира ва тартибда. Масалан, махсус ваколатли органларга жиноий даромадларни легаллаштириш, терроризмни молиялаштиришга қарши курашиш билан боғлиқ ахборот, шунингдек қонун бевосита ваколат берган бошқа органларга уларнинг вазифалари учун зарур маълумотлар тақдим этилиши мумкин.

Вафот этган шахснинг банк маълумотини меросхўр олиши мумкинми?

Ҳа. Жисмоний шахс вафот этганда банк сирини ташкил этувчи маълумотлар қонунда белгиланган тартибда:

васиятномада кўрсатилган шахсларга;
меросхўрларга;
васиятномани ижро этувчига тақдим этилиши мумкин. Мерос таркиби ва жойлашган жойини аниқлаш зарур бўлганда нотариал ва консуллик муассасалари ҳам тегишли маълумотларни олиши мумкин.

Зарур ҳужжатлар тўғри тақдим этилса, банк тегишли тўлиқ ахборот ва ҳужжатларни 5 иш куни ичида ёпиқ конвертда ёки ҳимояланган электрон канал орқали тақдим этиши шарт. Ҳужжатлар етарли бўлмаса, камчиликлар ҳақида ҳам 5 иш куни ичида хабар берилади.

Ижтимоий ёрдам тайинлашда банк маълумотлари текширилиши мумкинми?

Ҳа. 2025 йил 17 декабрдан Президент ҳузуридаги Ижтимоий ҳимоя миллий агентлиги ва «Инсон» ижтимоий хизматлар марказлари ижтимоий хизмат ёки ёрдам кўрсатиш учун зарур бўлса, ариза асосида ариза берувчи ва қонунда белгиланган айрим оила аъзоларига оид банк сирини ташкил этувчи маълумотларни олиш ва қайта ишлаш ҳуқуқига эга.

Маълумот учинчи шахсга қачон берилиши мумкин?

2025 йил 25 сентябрдан мижознинг банк олдидаги мажбурияти қонунда белгиланган тартибда учинчи шахс томонидан бажарилганда ёки банкнинг ҳуқуқи (талаби) бошқа шахсга ўтганда, банк сири маълумоти фақат бажарилаётган мажбурият ёки ўтган талаб доирасида тегишли учинчи шахсга тақдим этилиши мумкин.