Кўп квартирали уйнинг ертўласидан фойдаланиш тартиби

Ертўланинг ҳуқуқий мақоми

Кўп квартирали уйдаги жойлар мулкдорларига умумий мулк ҳуқуқи асосида тегишли яшаш учун мўлжалланмаган ертўла умумий мол-мулк ҳисобланади.

Ертўла ёки унинг бир қисмини ижарага ёхуд текин фойдаланишга бериш фақат жойлар мулкдорлари умумий йиғилишининг қарори асосида амалга оширилади.

Бунда фойдаланишга берилаётган умумий мол-мулкка бўлган ҳуқуқлар жойлар мулкдорлари номига давлат рўйхатидан ўтказилган бўлиши шарт.

Мурожаат ва умумий йиғилиш

Жисмоний ёки юридик шахс ертўладан фойдаланиш учун кўп квартирали уйни бошқариш органига ёзма мурожаат қилади. Мурожаатда:

шахсни ёки юридик шахснинг давлат рўйхатидан ўтганлигини тасдиқловчи маълумотлар;
режалаштирилаётган фаолият тури;
ертўладан фойдаланиш мақсади;
талаб этиладиган майдон;
зарур таъмирлаш ёки қайта режалаштириш ишлари кўрсатилади.

Бошқариш органи мурожаатни олганидан кейин 3 кундан кечиктирмай умумий йиғилиш чақириш чораларини кўради. Мулкдорлар йиғилиш ҳақида камида 10 кун олдин хабардор қилинади.

Йиғилиш ваколатли бўлиши учун барча мулкдорлар ёки улар вакилларининг 50 фоизидан кўпроғи иштирок этиши керак. Қарор ҳозир бўлганларнинг 50 фоизидан кўпроғи ёқлаб овоз берганда қабул қилинади.

Шартнома ва ижара тўловлари

Қарор қабул қилинганидан кейин бошқариш органи 5 иш кунидан кечиктирмай ертўладан фойдаланувчи билан ижара ёки текин фойдаланиш шартномасини тузиш чорасини кўради.

Шартнома солиқ органларининг электрон тизимида ҳисобга қўйилади. Мурожаат, умумий йиғилиш баённомаси, фаолият тури, майдон ва ижара тўловлари ҳақидаги маълумотлар «Менинг уйим» биллинг тизимига киритилади.

Ижарадан тушган маблағлар кўп квартирали уйнинг умумий мол-мулкини сақлашга йўналтирилади.

Рухсат этилган ва тақиқланган фаолият

Белгиланган хавфсизлик талабларига риоя қилинганда ертўлада савдо, маиший хизмат, офис, банк, почта, компьютер, таржима, дизайн, спорт ва низомда белгиланган бошқа фаолиятларни амалга ошириш мумкин.

Ертўлада қуйидагиларга йўл қўйилмайди:

яшаш жойи, ётоқхона, меҳмонхона ёки кинотеатр ташкил этиш;
саноат ишлаб чиқаришини жойлаштириш;
газ баллонлари, ёнувчи ва портлаш хавфи бўлган моддаларни сақлаш;
ҳаммом, сауна ёки жамоат ҳожатхонаси ташкил қилиш;
ҳайвонлар ва паррандаларни боқиш;
махсус лойиҳада назарда тутилмаган гараж ташкил қилиш;
эвакуация йўллари ва муҳандислик тармоқларига кириш жойларини тўсиб қўйиш.

Ертўладан фойдаланиш аҳолининг хавфсиз ва қулай яшашига салбий таъсир кўрсатмаслиги ҳамда муҳандислик-коммуникация тармоқларига хизмат кўрсатиш имкониятини чекламаслиги керак.

Таъмирлаш ва реконструкция

Ертўлада таянч ёки таянч бўлмаган деворларни ўзбошимчалик билан бузиш, кавлаш ёки муҳандислик коммуникацияларининг схемасини ўзгартириш тақиқланади.

Енгил материаллардан ораёпма девор ўрнатишга фақат:

шаҳарсозлик ва ёнғин хавфсизлиги талабларига зид бўлмаганда;
муҳандислик тармоқларига киришни чекламаганда;
белгиланган тартибда келишилган лойиҳа ҳужжатлари мавжуд бўлганда йўл қўйилади.

Ўзбошимчалик билан ўзгартирилган ертўла назорат органининг кўрсатмасига мувофиқ аввалги ҳолатига қайтарилиши, етказилган зарар эса суд қарори асосида қопланиши мумкин.