Ўзбекистонда Тошкентнинг янги халқаро аэропорти ва Самарқанднинг «юраги»ни боғлайдиган янги тезюрар темирйўл қуришга ҳозирлик кўрилмоқда. Жанубий Кореянинг Saman Engineering компанияси учта йўналиш вариантини тақдим этди.

Янги тезюрар темирйўлда Тошкент ва Самарқанд ўртасидаги қатнов вақти 1,5 соатгача қисқартирилади. Бу 19 ноябрь куни давлат-хусусий шериклик бўйича учинчи давра суҳбатида тақдим этилган транспорт вазири ўринбосари Жасурбек Чориев тақдимотидан келиб чиқади.

Унинг сўзларига кўра, лойиҳанинг техник-иқтисодий асослари грант ажратган Корея Эксимбанки кўмагида ишлаб чиқилган. Яқинда харид қилинган 6 та Hyundai Rotem поезди шу йил охиридан бошлаб етказиб берилади, 2026 йил бошидан эса йўловчиларга хизмат кўрсата бошлайди.

Чориевнинг сўзларига кўра, йўловчи ва юк ташиш линияларининг бир вақтда қўлланиши туфайли мавжуд темирйўл тармоғининг ўтказиш имконияти чекланган.

«Битта линиядан бир вақтнинг ўзида юк ва йўловчи ташишда фойдаланиш имконсиз, биз уни янада кенгайтира олмаймиз. Албатта, биз операцион жараёнларни оптималлаштиряпмиз, лекин шу билан бирга, махсус тезюрар темирйўл линиясини қуриш муҳим».

Тезюрар темирйўл Тошкентнинг янги халқаро аэропортини боғлаб, Самарқанд «юраги»га етиб боради.

Уч вариант

24 октябрь куни Жанубий Кореянинг Saman Engineering компанияси Тошкент — Самарқанд темирйўлининг учта эҳтимолий йўналишини тақдим этди.

Биринчи вариант:

• узунлиги — 282 км;
• ҳаракат вақти: 1 соат 26 дақиқа;
• ўртача тезлик — 185,7 км / соат;
• Инфратузилма: 74 та кўприк, 3 та туннел, умумий узунлиги 8,9 км.

Иккинчи вариант:

• узунлиги — 291,7 км;
• ҳаракат вақти: 1 соат 33 дақиқа;
• ўртача тезлик — 179,4 км / соат;
• Инфратузилма: 82 та кўприк, 1 та туннел, умумий узунлиги 16 км.

Учинчи вариант:

• узунлиги — 302 км;
• ҳаракат вақти: 1 соат 45 дақиқа;
• ўртача тезлик — 166,9 км / соат;
• Инфратузилма: 105 та кўприк, 2 та туннел, умумий узунлиги 9,6 км.

Ҳозирда «Афросиёб» поездларида йўл вақти тахминан 2 соат 13 дақиқани ташкил этади.