Ўзбекистон президенти Шавкат Мирзиёев 26 декабрь куни Олий Мажлис ва халққа мурожаатида экологик автомобилларни кўпайтириш бўйича беш йиллик дастур ҳақида эълон қилди.

Унинг доирасида маҳаллий электромобилларга 12 фоизли (Марказий банк асосий ставкасидан пастроқ), хорижий электромобилларга эса 16 фоизли автокредитлар ажратилади. Ёзда Ўзбекистон банкларида автокредитлар бўйича фоиз ставкалари 22,5 фоиздан 33 фоизгача бўлган.

Электромобилларни қувватлаш станцияларини ташкил қилиш учун тадбиркорларга 10 фоизли имтиёзли кредитлар берилади, ерларни аукциондан 2 карра арзон нархда сотиб олиш имконияти яратилади.

Бундан ташқари, электромобилларни қувватлаш станцияларида автомобилларни зарядлашда 1 киловатт-соат электр энергияси нархининг 300 сўмдан ошган қисми давлат бюджетидан қоплаб берилади. Электромобилда такси хизмати кўрсатадиган фуқароларга ҳам бир қатор имтиёзлар берилади, деди президент.

Унинг сўзларига кўра, шаҳарлардаги тирбандликлар «нафақат одамлар ҳаётини қийинлаштирмоқда, балки экологияга ҳам жиддий зарар етказмоқда». Дунё тажрибасидан келиб чиқиб, автомобиллар чиқараётган зарарли моддалар даражасига қараб экологик стикерлар тизими жорий этилади. Катта миқдорда зарарли моддалар чиқараётган автомашиналар пойтахт ва вилоят марказлари ҳамда шаҳарларга кириши чекланади.

Автопаркни янгилаш ва чиқиндиларни камайтириш учун давлат томонидан қўллаб-қувватлаш чоралари кўрилади. Бунинг учун алоҳида жамғарма ташкил қилинади.

Эски машинасини алмаштираман деганларга автокредит фоизининг бир қисми қоплаб берилади. Фильтр ўрнатиб, зарарни камайтиришга тайёр бўлган ҳайдовчилар учун харажатларининг бир қисми бўйича субсидия ажратилади.

Давлат раҳбари айтишича, пойтахтда ва йирик шаҳарларда жамоат транспортини ривожлантириш устувор вазифа бўлади. Шаҳар кўчаларида автобус ва таксилар учун махсус йўлаклар кўпайтирилади. Тошкент, Самарқанд ва Наманган шаҳарларида транспорт ҳаракатини интеллектуал светофорлар орқали бошқариш тизими жорий этилади.

«Мен яқинда Япониядан ўзим учун кўп нарса олиб келдим. Жуда кўп машина, лекин биронта тирбандлик йўқ. Светофор ўзи бошқаряпти. Нимага биз шуни ўрганмаймиз? Ҳа, биз ҳам ўргандик-ку, кўп нарсаларни. Шунинг учун интеллектуал светофорни келишдик улар билан, уларнинг мутахассислари келади. Мана, Туркияда жуда кўп тажриба бор, ўрганяпмиз. Албатта, буларни ҳам амалга оширамиз», — деди у.

Унинг сўзларига кўра, бу ишлар тўғри йўлга қўйилса, пойтахт, вилоят марказлари ва йирик шаҳарлар фақат ва фақат экотранспортлар ҳаракатланадиган ҳудудга айланишига асос солинади.

«Бу оғир бўлади, лекин бу якка-ю ягона тўғри йўлимиз», — деди президент.

Божхона қўмитаси маълумотларига кўра, 2025 йил январь-ноябрь ойларида Ўзбекистонга енгил автомобиллар импорти қиймат жиҳатидан ўтган йилнинг шу даврига нисбатан қарийб 14 фоизга — 1,23 млрд доллардан 1,06 млрд долларгача камайган. Шу билан бирга, миқдор жиҳатидан 4,5 фоизлик ўсиш кузатилган — 68,5 мингтадан 71,7 мингтагача (ўтган йили Пскент автопологони сабабли 4,1 фоизлик пасайиш қайд этилган эди).

Агар ўтган йили импортда электромобиллар улуши 32,4 фоизни ташкил этган бўлса, жорий йилда бу кўрсаткич 72,4 фоизга етган. Миқдорий жиҳатидан электр транспорт воситалари импорти 2,3 баробарга ошган — 22 220 тадан 51 856 тагача. Бензинли автомобиллар сони эса 30 294 тадан 16 985 тагача камайган.