Президент Шавкат Мирзиёев душанба куни тадбиркорларга нисбатан молиявий жарималарни қўллаш тартибини янада либераллаштириш ва ортиқча бюрократик тўсиқларни қисқартиришга қаратилган таклифлар тақдимоти билан танишди.
Жумладан, жорий йил 1 октябрдан бошлаб молиявий жарималарни ихтиёрий тўлашни рағбатлантиришнинг ягона янги тартибини жорий этиш таклиф қилинмоқда. Унга кўра, агар тадбиркор ваколатли орган қарори топширилган кундан бошлаб бир ой ичида жариманинг 50 фоизини тўласа, қолган қисмини тўлашдан озод этилади.
Шунингдек, жаримани 6 ой давомида тенг улушларда тўлаш имконияти ҳам назарда тутилмоқда. Бунда, агар қарор топширилганидан кейин бир ой ичида жариманинг 1/6 қисми тўланса, ушбу тартиб автоматик равишда қўлланилади.
Суд назоратини кучайтириш мақсадида, агар ваколатли органнинг жарима қўллаш ҳақидаги қарори суд томонидан бекор қилинса ёки ҳақиқий эмас деб топилса, ундирилган маблағлар 15 кун ичида қайтарилиши белгиланмоқда. Агар бу муддат бузилса, ҳар бир кечиктирилган кун учун Марказий банкнинг асосий ставкаси асосида фоизлар ҳисобланиши таклиф этилмоқда.
Шу билан бирга, Бизнес-омбудсман юритадиган «Ягона давлат назорати» ахборот тизимида тадбиркорларга нисбатан қўлланилган молиявий жарималарнинг электрон реестрини жорий этиш таклиф қилинмоқда.
Ваколатли органларнинг қарорлари қабул қилинганидан сўнг мажбурий тарзда ушбу тизимга киритилиши ва электрон рақамли имзо билан тасдиқланиши лозим бўлади.
Ахборот тизимига киритилмаган ва электрон рақамли имзо билан тасдиқланмаган қарорлар ҳақиқий эмас деб ҳисобланади ва улар асосида жарима ундиришга йўл қўйилмайди.
Шунингдек, молиявий жарималар ҳисобини юритиш, уларни мониторинг қилиш ва мобил илова орқали онлайн тўлаш имкониятини яратиш, шунингдек манфаатдор идораларнинг ахборот тизимларини интеграция қилиш зарурлиги таъкидланди.
Бундан ташқари, тадбиркорнинг шахсий кабинети орқали молиявий жарималар бўйича қарорларни онлайн тарзда шикоят қилиш механизмини жорий этиш, шикоят берилган пайтдан бошлаб қарор ижросини автоматик равишда тўхтатиб туриш ҳам назарда тутилмоқда.
Масъулларга тақдим этилган таклифларни пухта ишлаб чиқиш бўйича тегишли топшириқлар берилди.