Банкларда янги тартиб: 500 долларгача нақд валютани ҳужжатсиз сотиб олиш мумкин

Ўзбекистонда банклар орқали нақд чет эл валютасини сотиб олиш тартиби янада соддалаштирилди. Эндиликда фуқаролар 500 АҚШ долларигача бўлган миқдордаги нақд чет эл валютасини паспорт, ID-карта ёки шахсни тасдиқловчи бошқа ҳужжатларни тақдим этмасдан харид қилиши мумкин.

Мазкур тартиб Адлия вазирлиги ташаббуси билан қабул қилинган тегишли идоравий ҳужжат асосида жорий этилди.

Рўйхат рақами 2886-12 бўлган ҳужжат 2026 йил 8 майда қабул қилинган бўлиб, 9 августдан эътиборан кучга кирди.

Янги тартибга кўра, банкдан 500 АҚШ долларигача нақд чет эл валютасини сотиб олаётган шахсдан паспорт, ID-карта ёки уларнинг ўрнини босувчи бошқа ҳужжатни тақдим этиш талаб қилинмайди.

Аввалги тартибда эса ҳужжатсиз нақд чет эл валютасини сотиб олиш мумкин бўлган энг юқори миқдор 100 АҚШ долларини ташкил этар эди. Шу тариқа, ҳужжатсиз валюта харид қилиш бўйича белгиланган лимит 5 бараварга оширилди.

Адлия вазирлиги маълумотига кўра, бундай ташаббуслар аҳоли учун қўшимча қулайликлар яратиш, ортиқча маъмурий жараёнларни қисқартириш ҳамда хизматлардан фойдаланишни соддалаштиришга қаратилган.