Avtomototransport vositasiga mulk huquqi yoki boshqa ashyoviy huquq vujudga kelgan, boshqa shaxsga o‘tgan yoxud transport vositasining huquqiy holati o‘zgargan kundan boshlab u 10 kalendarь kun ichida davlat ro‘yxatidan yoki qayta ro‘yxatdan o‘tkazilishi kerak.

Agar muddatning oxirgi kuni dam olish yoki bayram kuniga to‘g‘ri kelsa, undan keyingi birinchi ish kuni muddatning oxirgi kuni hisoblanadi.

Transport vositasi ro‘yxatdan o‘tkaziladigan holatlar

Avtomototransport vositasi quyidagi hollarda davlat ro‘yxatidan o‘tkaziladi:

• diler yoki boshqa qonuniy sotuvchidan yangi transport vositasi olinganda;
• xorijdan olib kirilgan avtomobilь «erkin muomalaga chiqarish (import)» bojxona rejimida rasmiylashtirilganda;
• ishlatilgan transport vositasining egasi oldi-sotdi, hadya, ayirboshlash, meros yoki boshqa asosda o‘zgarganda;
• ilgari davlat ro‘yxatidan o‘tkazilmagan transport vositasiga mulk huquqi vujudga kelganda.

Qayta ro‘yxatdan o‘tkaziladigan holatlar

Quyidagi hollarda transport vositasini qayta ro‘yxatdan o‘tkazish talab etiladi:

• jismoniy shaxsning familiyasi, ismi yoki otasining ismi o‘zgarganda;
• yuridik shaxs qayta tashkil etilganda yoki uning nomi o‘zgarganda;
• transport vositasi egasining yashash joyi yoki yuridik shaxsning pochta manzili o‘zgarganda;
• transport vositasi qayta jihozlanganda;
• ro‘yxatdan o‘tkazish guvohnomasi yaroqsiz holga kelganda, shikastlanganda yoki yo‘qolganda;
• davlat raqami belgisi yo‘qolganda, o‘g‘irlanganda yoki yaroqsiz holga kelganda;
• transport vositasining ro‘yxat ma’lumotlariga o‘zgartirish kiritish zarur bo‘lganda.

Murojaat joyi

Transport vositasini ro‘yxatdan o‘tkazish uchun uning egasi yoki vakolatli vakili Yo‘l harakati xavfsizligi xizmatining ro‘yxatdan o‘tkazish va imtihon olish bo‘linmasiga murojaat qiladi.

Jismoniy shaxsga tegishli transport vositasi, qoida tariqasida:

• mulkdorning yashash joyi bo‘yicha ro‘yxatdan o‘tgan hududida;
• yashash joyi bo‘yicha ro‘yxat mavjud bo‘lmasa, turgan joyi bo‘yicha ro‘yxatdan o‘tkaziladi.

Shu bilan birga, transport vositasini mulkdorning ro‘yxatdan o‘tgan hududidan qat’i nazar, har bir hududda bunday xizmatni ko‘rsatish uchun mas’ul etib belgilangan hududiy YHXX organida eksterritorial tartibda ham ro‘yxatdan o‘tkazish mumkin.

Muhim: avtotransportni ro‘yxatdan o‘tkazish bo‘yicha YaIDXPda amalda faol davlat xizmati mavjud emas. Shu sababli transport vositasi va hujjatlar bilan bevosita tegishli YHXX ro‘yxatdan o‘tkazish bo‘linmasiga murojaat qilish lozim.

Taqdim etiladigan hujjatlar

Holatga qarab quyidagilar taqdim etiladi yoki axborot tizimlari orqali tekshiriladi:

• transport vositasi egasi yoki uning vakilining arizasi;
• shaxsni tasdiqlovchi hujjat;
• vakil murojaat qilganda uning vakolatini tasdiqlovchi ishonchnoma;
• notarial tasdiqlangan oldi-sotdi, hadya yoki ayirboshlash shartnomasi;
• diler yoki distribьyutor tomonidan berilgan elektron hisob-ma’lumotnoma;
• merosga bo‘lgan huquq to‘g‘risidagi guvohnoma yoki mulk huquqini tasdiqlovchi boshqa hujjat;
• ishlatilgan transport vositasining avvalgi ro‘yxatdan o‘tkazish guvohnomasi;
• import qilingan avtomobilь bo‘yicha bojxona organidan yuborilgan elektron ma’lumotlar;
• qonunchilikda nazarda tutilgan hollarda muvofiqlik va texnik hujjatlar;
• belgilangan to‘lovlar amalga oshirilganini tasdiqlovchi ma’lumot.

Davlat organlarining axborot tizimlarida mavjud bo‘lgan ma’lumotlarni fuqarodan qog‘oz shaklida talab qilishga yo‘l qo‘yilmaydi, qonunchilikda nazarda tutilgan hollar bundan mustasno.

Transport vositasini ko‘rikdan o‘tkazish

Ro‘yxatdan o‘tkazishdan oldin transport vositasi texnik ko‘rik uchun YHXX bo‘linmasiga taqdim etiladi. Avtomobilning texnik holati uni ko‘rikka taqdim etmaslik uchun asos bo‘lmaydi.

Ko‘rik jarayonida:

• kuzov, shassi va dvigatelь raqamlari;
• VIN-kod va boshqa identifikatsiya belgilari;
• marka, modelь, rang va ishlab chiqarilgan yil;
• to‘liq vazn va o‘rindiqlar soni;
• raqamli agregatlarning hujjatlarga muvofiqligi;
• transport vositasiga taqiq, xatlov yoki boshqa cheklov mavjudligi;
• avtomobilь olib qochilgan yoki o‘g‘irlangan transport bazasida turgan-turmaganligi tekshiriladi.

Ko‘rik natijasi bo‘yicha rasmiylashtirilgan ma’lumotnoma yoki shtamp 10 kalendarь kun davomida haqiqiy hisoblanadi.

Muhim: kuzov, shassi, dvigatelь yoki VIN raqamlarida o‘chirish, o‘zgartirish yoki qalbakilashtirish alomatlari aniqlansa, transport vositasini ro‘yxatdan o‘tkazish to‘xtatilib, materiallar tegishli tekshiruv uchun vakolatli organga yuborilishi mumkin.

Avtomobilь uchun amaldagi to‘lovlar

Oddiy benzin yoki dizelь dvigatelli avtotransport vositasini dastlabki davlat ro‘yxatidan o‘tkazishda quyidagi asosiy to‘lovlar undiriladi:

• transport vositasini davlat ro‘yxatidan o‘tkazish — 6,84 BHM;
• avtomobilь uchun oddiy davlat raqami belgisini berish — 3,5 BHM;
• ro‘yxatdan o‘tkazilganlik to‘g‘risidagi guvohnomani berish — BHMning 70 foizi.

Shunday qilib, oddiy avtomobilь birinchi marta ro‘yxatdan o‘tkazilib, unga oddiy davlat raqami va guvohnoma berilganda ushbu uchta asosiy to‘lovning umumiy miqdori 11,04 BHMni tashkil etadi.

Elektromobilь va gibrid avtomobilь uchun to‘lovlar

Elektromobilь va belgilangan toifadagi gibrid avtomobilь uchun:

• davlat ro‘yxatidan o‘tkazish — 1,5 BHM;
• oddiy avtomobilь davlat raqamini berish — 3,5 BHM;
• ro‘yxatdan o‘tkazish guvohnomasini berish — BHMning 70 foizi.

Ushbu uchta asosiy to‘lovning umumiy miqdori 5,7 BHMni tashkil etadi.

Mototsikl, moped, skuter va tirkamalar uchun to‘lovlar

Mototsikl, elektromototsikl, moped, skuter va tirkamalar uchun:

• davlat ro‘yxatidan o‘tkazish — 1,5 BHM;
• davlat raqami belgisini berish — 1,5 BHM;
• ro‘yxatdan o‘tkazish guvohnomasini berish — BHMning 70 foizi.

Asosiy to‘lovlarning umumiy miqdori 3,7 BHMni tashkil etadi.

Qayta ro‘yxatdan o‘tkazish to‘lovi

Barcha turdagi avtomototransport vositalarini qayta ro‘yxatdan o‘tkazish uchun BHMning 10 foizi miqdorida to‘lov undiriladi.

Agar qayta ro‘yxatdan o‘tkazishda yangi guvohnoma yoki yangi davlat raqami beriladigan bo‘lsa, ular uchun belgilangan to‘lovlar alohida undiriladi.

Muhim: 3,5 BHM — tizim tomonidan oddiy tartibda beriladigan avtomobilь davlat raqamining to‘lovi. AvtoRaqam ilovasida tanlangan yoki xaridorgir kombinatsiyali raqamlar uchun yagona oshirilgan to‘lov qo‘llanadi. Shu sababli ilovadagi raqamlar oddiy davlat raqamidan ancha qimmat bo‘lishi mumkin.

Ro‘yxatdan o‘tkazish natijasi

Talablar bajarilgandan keyin transport vositasi haqidagi ma’lumotlar elektron ro‘yxatga kiritiladi va mulkdorga:

• transport vositasi ro‘yxatdan o‘tkazilganligi to‘g‘risidagi guvohnoma;
• belgilangan namunadagi davlat raqami belgisi beriladi.

Davlat raqami transport vositasiga belgilangan joylarga mustahkam o‘rnatilishi kerak. Raqamni o‘zgartirish, ustiga qoplama qo‘yish, uning belgilarini ko‘rishga to‘sqinlik qilish yoki boshqa transport vositasida ishlatish taqiqlanadi.

Avtomototransport vositalarini davlat ro‘yxatidan o‘tkazish tartibi Vazirlar Mahkamasining 2017-yil 31-avgustdagi 683-son qarori, to‘lovlar miqdori esa 2011-yil 21 dekabrda 2303-son bilan davlat ro‘yxatidan o‘tkazilgan to‘lov stavkalari bilan belgilangan.