Nogironligi bo‘lgan bolalarni “G‘amxo‘rlik” markazlariga joylashtirish

«G‘amxo‘rlik» markazlari qanday muassasa?

Nogironligi bo‘lgan bolalar uchun «G‘amxo‘rlik» markazi — ruhiy holati buzilgan 3 yoshdan 18 yoshgacha bo‘lgan bolalarga parvarish, ijtimoiy, tibbiy, reabilitatsiya va tarbiya-ta’lim xizmatlarini ko‘rsatuvchi davlat muassasasi.

Markazlar Ijtimoiy himoya milliy agentligi tizimida faoliyat yuritadi. Ularning o‘rinlar soni sanitariya qoidalari va gigiena normativlari hisobga olingan holda belgilanadi.

Qaysi bolalar joylashtirilishi mumkin?

Markazga ruhiy holati buzilgan, tibbiy ko‘rsatmalari mavjud bo‘lgan 3 yoshdan 18 yoshgacha nogironligi bo‘lgan bolalar joylashtiriladi.

Bolani qabul qilish uchun:

psixologik-tibbiy-pedagogik komissiyaning ijobiy xulosasi;
tegishli markazda bo‘sh o‘rin mavjudligi talab etiladi.

Tashxisning o‘zi bolani avtomatik ravishda markazga qabul qilish uchun etarli emas. Bolaning sog‘lig‘i, rivojlanishi va ta’lim ehtiyojlari komissiya tomonidan kompleks baholanadi.

Psixologik-tibbiy-pedagogik komissiya — PTPK — bolaning rivojlanishi, sog‘lig‘i va alohida ta’lim hamda ijtimoiy xizmatlarga ehtiyojini baholaydigan komissiya.

Qaerga murojaat qilinadi?

Bolaning ota-onasi yoki boshqa qonuniy vakili PTPK tekshiruvidan o‘tish uchun:

yashash joyidagi «Inson» ijtimoiy xizmatlar markaziga;
hududga biriktirilgan ijtimoiy xodimga;
Davlat xizmatlari markaziga;
YaIDXP orqali elektron shaklda murojaat qilishi mumkin.

Shaxsan murojaat qilinganda so‘rovnomani mas’ul xodim ariza beruvchi nomidan to‘ldiradi. YaIDXP orqali murojaat qilinganda qonuniy vakil so‘rovnomani mustaqil to‘ldiradi.

PTPK tekshiruvi pullimi?

PTPK tekshiruvi uchun haq undirilmaydi.

Qonuniy vakil:

so‘rovnomadagi ma’lumotlarni tasdiqlaydi;
komissiya belgilangan vaqtda bolani tekshiruvga olib keladi;
xizmat ko‘rsatishning istalgan bosqichida tekshiruvdan voz kechishi mumkin.

Tekshiruvdan voz kechilsa, so‘rovnoma ko‘rmasdan qoldiriladi.

Joylashtirish haqidagi qaror qanday qabul qilinadi?

PTPK bolaning tibbiy, psixologik, pedagogik va ijtimoiy holatini o‘rganib, markazga joylashtirish bo‘yicha xulosa beradi.

Ijobiy xulosa mavjud bo‘lsa va markazda bo‘sh o‘rin bo‘lsa, bolaning elektron hujjatlari tegishli axborot tizimi orqali rasmiylashtiriladi. Natija haqida qonuniy vakilga SMS-xabar yoki elektron xabarnoma yuboriladi.

Markazda qanday xizmatlar ko‘rsatiladi?

Markazda bolaga:

xavfsiz yashash va parvarish sharoiti;
oziq-ovqat, kiyim-kechak, dori vositalari va tibbiy buyumlar;
sog‘lomlashtirish va reabilitatsiya;
ijtimoiy moslashuv;
o‘z-o‘ziga xizmat qilish ko‘nikmalari;
individual imkoniyatiga mos ta’lim va kasb-hunar o‘rgatish;
reabilitatsiya vositalari va shaxsiy gigiena buyumlari taqdim etiladi.

Xizmatlar bolaning yoshi, holati, rivojlanishi va shaxsiy ehtiyojlariga mos tashkil etilishi kerak.

Rad etilsa nima qilish mumkin?

Joylashtirish rad etilganda elektron hujjatlar kamchiliklar ko‘rsatilgan holda «Inson» markaziga qaytariladi va qonuniy vakil xabardor qilinadi.

Kamchiliklar bartaraf etilgandan keyin qayta murojaat qilish, shuningdek qaror yoki harakatsizlik ustidan yuqori turuvchi organga yoki sudga shikoyat qilish mumkin.

Normativ hujjatlar

Vazirlar Mahkamasining 2026-yil 21-maydagi 271-son qarori